«Голосы Русинів Підкарпатя» – середа, 18.10 год.

Вже сьме не раз говорили о тім, же маленьке Підкарпатя є повне талентованых творческых людей. І векшына з них малярі. При тім многы ани день не ходили до малярьской школы.

Днешній наш герой Василь Бомбушкар не має малярьского школованя, але то не помішало му стати знамым у краю малярьом, і быти членом умелецького общества Арт-Свалява.

Божый дар до малярьства, котрый быв у Васильови од народжіня, проявив ся, коли хлопець як 14-річный перемальовав фарбами на полотні образ Віктора Васнецова «Богатирі». Робота, зроблена за нецілый рік, доднесь ся всокочує у родині Бомбушкаря.

За свого діштанчного учітеля Василь рахує пейзажисту Івана Шишкіна. І найвеце любить мальовати пейзажы. Але пейзажы нашы – карпатьскы, з горами, зворами і смерековыма лісами.

Образы Василя Бомбушкаря натілько максимално точно, майже фотоґрафічно оддзеркалюють реалность, же мож встановити і штіл, в котрім наш герой робить – суперреалізм (або гіперреалізм, фотореалізм), што є напрям в уменю, котрый ся родив у 1960-ых і 1970-х роках.

Слухайте «Голосы Русинів Підкарпатя» в середу 15-го апріля 2026 р. о 18.10 год., або повторіня в четверь 16-го апріля о 4.30 год. і в суботу 18-го апріля о 11.00 год. за русиньскым часом.