Голосы Русинів Підкарпатя» – середа, 18.10 год.

В днешнім выданю представиме вам другу часть інтервю із солістом русиньской музичной ґрупы Чаламада з Підкарпатя Робертом Тіводором.

Побісідуєме детайлніше о спеціфіці розвоя сучасной русиньской музикы на Підкарпатю. А так само розпросиме ся нашого респондента о творчіх планах до будучности.

«Чаламада – традиційний Закарпатський салат. Береме скляну банку тай мечеме у неї жменю доброго настрою, надрубіцковані свіжі новти, много позитиву тай піціцько лірики для пікантності. Чекайте наш салат у вашому місті! Смачного прослуховування», — так себе предстваляє творчій колектів на своїй офіціалній сторінці на Facebook.

Ключовы темы інтервю:

• Різноплановы творчі проєкты Роберта Тіводора
• Актуалный стан музичной културы на Підкарпатю
• Творчі іншпірації Роберта Тіводора

Роберт Степановіч Тіводор народив ся 22-го новембра 1976-го року як старшый сын у малодітній родині в місті Виноградово, Підкарпатя. Отець робив міліціонаря, а мама дома за дітми і ґаздівством дозерала.

Дома ся говорило по російскы або, як то коментує сам респондент, «на тіводорівскому суржикови російского языка», так як отець – коріный підкарпатьскый мадяр, а мамчина файта ся перебрала на Підкарпатя з Росії, они там суть наполовину росіяны а наполовину українці з восточной Україны. «А релігійных традіцій і звыків мы ся не додержовали, вшытко было пропитано комуністічныма цінностями, але дуже-м любив ходити до отцьовой родины на сята, а найбівше на Корочонь», — з усміхом на твари споминать Роберт.

У Виноградові здобыв неповну середню освіту, а то вісем клас у російскоязычній школі, і закінчів шпеціалізовану електротехнічну середню. За професійов не робив. В році 1995 за радов отця ішов на штудії  на Націоналну академію внутрішніх діл Україны в Івано-Франківску, де штудовав чотыри рокы. По успішнім закінчіню академії чотыри рокы робив на Одділіню кріміналной міліції по ділах малолітніх у Виноградові.

Музика в жывоті Роберта Тіводора была з самого дітинста, кедьже його отець за молодости быв музикантом і хотів абы його дітвак ходив у музичну школу і ся розвивав в тім напрямі. Дома была маленька акустічна ґітара шпеціално куплена про юного Роберта, но та простояла десь років пять некывана. Першы музичны проявы были почас штудентьскых років у Івано-Франківску, але тогды было модно говорити по російскы, одповідно і тексты свой зачінаючій артіста писав і выконовав по російскы (із слов респондента). А наслідно тенденція ся поміняла і співак зачав творити на україньскім языку.

До року 2003, коли Роберт Тіводор лишыв свою основну роботу, він встиг вже поучаствовати в аматерьскій роковій ґрупі Happy Pigs, што і помогло ся подати в творчость наповно. В році 2004 основав русиньскоязычну рокову ґрупу CORDON з іншыма виноградівскыма музикантами. Вєдно з колектівом у році 2005 одкрыли першу рекламну аґентуру в роднім місті, котра жывила їх матеріално, «бо з музиков туй заробити на хліб нереално».

За дакілько років доста успішна ґрупа CORDON і сполочный бізніс ся розпадать, і амбіціозный співак пробує ся в далшых музичных проєктах, але наконець вырішує робити властну солову карьєру і «ся занимати ділами, котры мі приносять щастя і наповненість», додає Роберт.

В році 2015 маючі в арсеналі пару новых творчіх доробків по русиньскы артіста зберать нову музичну банду, котра пізніше стала популарна під назвом Чаламада. На днешній день у їй складі суть: Роберт Тіводор – вокал; Василь Полажинець – ґітара, вокал, бек вокал; Юрій Тесличко – перкусії; Сергій Радченко – труба, бек вокал; Едуард Скунць – басґітара; Ерік Йоні – бубны.

Од основаня выдали два СD албумы, першый «Пушлисьме» у році 2017, а другый «Піціцько» зачарком року 2020. Творчій колектів грає не лем на Україні, але встиг дати о собі знати за їй граніцями (Німецько, Польща). В близкій будучности планують свої концерты провести і на Словакії.

Паралелно з музиков Роберт Тіводор реалізує ряд далшых творчіх проєктів. В роках 2009 – 2014 быв орґанізатором унікатного арт-пікніку Креденць на Підкарпатю. Вєдно із женов, Ольгов Тіводор, котра є художницьов і ілустраторков, в році 2013 презентовали книжку народной кухні Підкарпатя Фіномшаг по-севлюшськи. А в році 2019 основав родинный бізніс – майстерню Should buy wood, котра ся занимать выготовліньом предметів декору з дерева.

Слухайте «Голосы Русинів Підкарпатя» в середу 30-го юна 2021 р. о 18.10 год., або повторіня в суботу 3-го юла 2021 р. о 11.00 год. за русиньскым часом.