Голосы Русинів Підкарпатя» – середа, 18.10 год.

Днесь в нашім выданю представиме вам першу часть інтервю артістом з Підкарпатя Іштваном Халусом, в сучасности солістом русиньской музичной етно-рок ґрупы Vandor / Вандор.

Поговориме нелем на професійны темы, але співак нам повість бівше о своїм особнім жывоті: о тім як і чому музика прийла до його жывота.

Ключовы темы інтервю:

• Жывотна путь артісты од дітинства до сучасности
• Карьєрна путь і творче выгоріня
• Участь в проєкті Rock-H / Рокаш

Іштван Халус народив ся 20-го августа 1979-го року як старшый сын у малодітній мадярьскоязычній родині в місті Мукачово на Підкарпатю. Докы отець з мамов тяжко робили в Мукачовскій товарнї «Точприлад», бабка дома за дітми і ґаздівством дозерала.

Якраз она, бабка Розалія Деак, іщі од дітинства малому Іштванови прививала любов до высокой културы і зограла ключову роль у становліню свого внука як творчой особности. Слуханя музичных композіцій на радію Petőfi было неоддільным родинным рітуалом.

Шістьрічного дітвака недовго думаючі бабка дала до Мукачовской дітячой школы умень Н1 ім. С. Ф. Мартона на гуслі, а так само паралелно юный Іштван брав участь в Мукачовскій хоровій школі хлопчиків і юнаків. То му пак дало можность путовати і увлдіти Европу на властны очі на кінцьом минулого стороча, коли о тім ани не могли снити жытелі Підкарпатя  (із слов респондента).

Повну середню освіту, а то єденадцять клас, здобыв в мукачовскій мадярьскій школі. «З них девять років єм ходив до російской клас, а послідны два рокы до мадярьской, бо тогды так модно было. А то по україноязычній матерьскій школі,» з усміхом на твари споминать Іштван.

Наслідно в році 1996 пішов ся учіти на Ужгородьску музичну школу імени Д. Є. Задора на одділіня спуві. По успішнім закінчіню в році 1999 вырішыв продовжыти свої музичні штудії на Львівскій націоналній музичній академії імени М. Лисенка під веджіньом земляка професора Александра Михайловіча Врабеля. Нажаль, по двох роках навчаня Іштван Халус мусив опустити академічны штудії і вернути домів вдяка тогочасной корупчной сістемы.

Од року 2002 аж до днесь є артістом професіоналного колектіву Академічного камерного хору Cantus в Ужгороді. А так само є солістом камерно-інструменталного ансамблю Угорські мелодії при Закарпатьскій областній філгармонії.

В періоді років 2009 – 2015 быв членом популарного підкарпатьского музичного проєкту Rock–H / Рокаш, де быв співаком.

На зачатку року 2017 композітор Радіон Sun Lion (бывшый басґітаріцта Rock–H / Рокаш) маючі в арсеналі пару новых автентічных русиньскых творчіх доробків пропонує Іштванови Халусови створити нову музичну банду, котра пізніше стала популарна під назвом Vandor / Вандор.  На днешній день у їй складі суть: Іштван Халус – вокал; Арсен Бабиченко – ґітара; Радіон Sun Lion– басґітара; Дмитрій Шевчук– бубны.

Од основаня ґрупы выдали два СD албумы. Першый «Вуйко Мацур» быв выданый у році 2017, а другый «Я туй»  на зачатку року 2019. Творчій колектів встиг твердо о собі дати знати на музичній арені і в році 2019 здобыв перемогу на юбілейнім 30-ім Всеукраїньскім фестівалі сучасной пісні «Червона Рута» у номінації «Рок-музика» у Чернівцях.

Розвиваючі ся як професіоналный музикант Іштван Халус также здобыв ступень бакаларя на Ужгородьскій факулті Київской націоналной універзіты културы і умень (рр. 2019 – 2020). Пак зачав робити в шпеціалізованій музичній школі в Ужгороді, де учітелює і днесь. Окрем того в сучасности робить маґістерьскы штудії на Мукачовскій державній універзіті.

Слухайте «Голосы Русинів Підкарпатя» в середу 21-го юла 2021 р. о 18.10 год., або повторіня в суботу 24-го юла 2021 р. о 11.00 год. за русиньскым часом.