«Голосы Русинів Підкарпатя» – середа, 18.10 год.

В днешнім выданю представиме вам коротке інтервю з директорков, художнов ведучов і головным діріґентом Заслуженого академічного Закарпатьского народного хору Наталійов Петій-Потапчук.

Інтервю ся записовало в просторах Закарпатьской областной філгармонії 21-го януара 2022-го року перед выступліньом Заслуженого академічного Закарпатьского народного хору з фолк-шоу «Калап долу». А бісідовали сьме о унікатности і значіню даного дійства.

Выбрана часть шоу «Калап долу» буде представлена в ефірі. Будеме мати можность чути атмосферу русиньского сельского балу: народны пісні і танці.

Ключовы темы інтервю:

• О фолк-шоу «Калап долу» од Наталії Петій-Потапчук
• Запис выбраной части – сельскый бал
• Важность діялности ЗАЗНХ

Наталія Йосипівна Петій-Потапчук (Петій по отцьови) народила ся 25-го януара 1963-го року в селі Доманинці під Ужгородом, Підкарпатя. У родині од дітвака прививали любов і повагу до родной пісні, танцю. Выростаючі в културных традіціях і звыках юна Наталія вже тогды вырішыла свій жывот звязати з народнов музиков.

Наперед музична школа, так з одзнаком закінчіла Ужгородьскый державный музичный коледж імени Д. Є. Задора (р. 1982). Наслідно продовжыла свої музичны штудії на Львівскій націоналній музичній академії імени М. Лисенка, де штудовала на діріґентьскій факулті (р. 1987). Спочатку хотіла быти співачков, але так собі роздумала.

Іщі із штудентьскх років робила з многыма колектівами: хоровыма, вокалныма. Іщі і сполупрацуючі з аматерьскыма колектівами выводила їх на высоку уровень. За їй найуспішнішый тогочасный проєкт ся поважує народный вокалный ансамбель Красія, з котрым обїздили майже цілу Европу. Окрем того было одкрыте вокалне штудіо з єднаков назвов.

Од 1987-го pоку є педаґоґом Ужгородьского коледжа културы і уменя, в роках 1990—2003 вела одділіня хорового діріґовання, старшый педаґоґ.

Од 2003-го року є старшым педаґоґом Ужгородьского державного музичного коледжа імени Д. Є. Задора, од децембра 2004-го року доцентом містных філій Київськой націоналной універзіты културы і уменя а так само Донецькой музичной академії імени С. Прокофєва.

Од 15-го авґуста 2006-го року стала директорков, художнов ведучов і головным діріґентом Заслуженого академічного Закарпатьского народного хору. Паралелно з актівнов роботов хору розвивать ся ряд далшых новых творчіх проєктів за ініціатівы пані Наталії. Так у році 2018 быв першый раз презентованый ґалаконцерт Зіркове майбутнє Срібної Землі. Каждый рік дірекція глядать і помагає розвивати новы таленты з вшыткых куточків Закарпаття.

«Бо як будуть співати діти, будуть співати молоды люде, то воно ся не втратить», підчаркує ведуча ЗАЗНХ.

Під редакційов Наталії Петій-Потапчук вышли книжкы Запаль, мила, свічку (репертоарный зборник творів народного вокалного ансамблю Красія) і Заслужений академічний Закарпатський народний хор.

За высоку професійну діялность Наталія Петій-Потапчук была оцінена многыма нагородами і медайлами державного і меджінародного характеру. Кавалер Ордена княгыні Олґы II. і III. ступня, залуженый працовник културы Україны (р. 1988). У 2020-ім році наряджіньом презідента Україны Володиміра Зеленьского была удостоєна Орденом княгыні Олґы I. ступня.

І так безперестайно продовжує трудити ся вже котрый рік під кредом Любім своє, бо хто, кедь не мы.

Слухайте «Голосы Русинів Підкарпатя» в середу 26-го януара 2021 р. о 18.10 год., або повторіня в суботу 29-го януара 2021 р. о 11.00 год. за русиньскым часом.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА