«Голосы Русинів Підкарпатя» – середа, 18.10 год.

До Вашой увагы інтервю з головов Народной рады Русинів Закарпатя, заслуженым лікарьом Україны, Євгеном Жупаном, котрый є актівным діятельом русиньского руху на Підкарпатю вже понад 30 років.

Будете мати можность послухати собі екскурз о історії Русинів Підкарпатя ХХ. стороча на основі зажытків нашого респондента і його предків.

О учітелюваню нянька в русиньскім школстві за Чехословакії, о розкуркульованю і примученій депортації старых родічів на Сібір за Совітьского союзу, о возрождіню русинства по 1989-ім році, і многім далшім.

Інтервю было записано нажыво в октобрі 2022-го року.

Ключовы темы інтервю:

• Русинство через жывот родины Жупанів
• Чехословацькый період як спомин на політіку демокрації
• Совітьскы часы і заказаня русинства

Євген Євгеновіч Жупан народив ся 1-го януара 1951-го року у родині містной інтеліґенції в селі Ракошино близко Мукачова на Підкарпатю. Отець учів біолоґію, ґеоґрафію, математіку, а в Чехословацькый період робив у русиньскій школі; мама была філолоґ російского языка.

„Нянько мені іщі з дітства толковав, што мы Русины, айбо то не мож было наголос говорити, бо совітьска сістема была тоталітарна і тема русинства была запріщена,” споминать о втогдышніх реаліях респондент.

У році 1967 здобыв середню освіту. Наслідно пішов до Ужгорода на высокошкольскы штудії, де в році 1973 успішно закінчів медічну факулту Ужгородьской державной універзіты.

Робити почав у місті Дубровиці Рівненьской области, де быв хірурґом-анестезіолоґом штиры рокы (рр. 1973 -1977), з них послідій піврок быв районным хірурґом. Дале вернув ся на отцюзнину  і од 1977- року до днесь робить у Мукачові в областнім дітячім шпыталю.

В сучасности Євген Жупан є практікуючій дітячій лікарь-анестезіолоґ і ведучій одділіня анестезіолоґії і інтензівной терапії в Закарпатьскім областнім дітячім шпыталю. Має чісленны фаховы научны публікації з вопросів анестезіолоґії, дітячой реанімації і хірурґії. Має высшу катеґорію по дітячій анестезіолоґії, є членом Меджінародной асоціації анестезіолоґів і Словацького лікарьского общества.

Хоць і цілый свій жывот присвятив лікарьскій справі, але паралелно все бік по боці ішла русиньска културно-общественна діятельность, головно по році 1989. Вєдно з далшыма русиньскыма актівістами в році 1996 зорґанізовав першый областный фестівал русиньской културы Червена ружа, котрый і до днесь продовжує свою традіцію (в 2021-ім одбыв ся 23-ій річник фестівалу).

Од року 2005 Євген Жупан є головов орґанізації Народна рада Русинів Закарпаття, котра зъєдиняє 7 основных русиньскых орґанізацій.

Окрем того быв головов областного общества Лігы націоналностей Закарпатя, членами котрого было 17 областных націонално-културных обществ.

Быв посланцьом Мукачовськой містьской рады (рр. 1990 – 1994), а так само посланцьом областной рады пятьох зборів за рядом (рр. 1994 – 2019).