«Говорить Пряшів» – пятниця, 18.10 год.

Витайте по тыжню часу. Якоси скоро злетіло, але тіж дост дуже ся подіяло. Не лем в тым великым світі, але і в тым нашым – русиньскым, лемківскым.

На жаль, в першій черзі приходят тоты смутны річы. Так тіж зачнеме в нашій днешній передачы, коли припомянеме собі недавно помершого продолжытеля славного роду Бескідовых – Гавриіла Бескіда, вірного сына Пряшівщыны, славного русиньского діяча. Вічна Йому Памят!

В «Книжници.фм» прочытаме оповіданя Штефана Смолея під назвом «Юрко на рекреациі». «Перличка» принесе нам фраґмент з ґазеты «Недѣля». Припомнут нам Михаіла Потушняка як доборого і просвіченого Русина.

І остатня част то «Припомінка». Ту нашы камаратя – пряшівскы редакторы – побесідуют о забытых русиньскых співанках, котры треба вернути до нашых репертуарів.

Так як раз тото вызерат. Ждеме уж вечером, о 18.10 год.