Ци Вам тіж так скоро минул робочый тыжден? Є то чыста шаленота, так скоро жене час, світ і жытя. Ліпше ся часом затримати, бо не забудеме на важны річы.
Пришла слідуюча пятниця, а з ньом реґулярный вікендовый проґрам нашого радия. Пятницю вечер посвячаме на основный проґрам пряшівскых Руснаків – «Говорить Пряшів». Просиме на стрічу з нима, понеже і мы годны ся дашто цікаве дознати. Пряшівскы Лемкы, котры сут як і мы, тіж слухают радия ЛЕМ.фм, бо знают, же в нас фай музика, мудры проґрамы і цікавы бесіды.
Будте готовы на мішок цікавых і новых інформаций. Кєд Вам треба, возте си зошыт і нотуйте вшытко, што почуєте! Еґзаміну з того нихто не буде робил, але все вартат си занотувати штоси, што неодолга годно ся нам призабыти. А того не хоче нихто.
На знимці будівлі подібны до тых пряшівскых. Але ніт. Дали сте ся набрати. То нашы Ґорлиці, котры – кєд пізриме на свій спосіб на них – припоминают центр Пряшівской Руси. Знимка за Нацийональным Цифровым Архівом.
Коментарі