«Говорить Пряшів» – пятниця, 18.10 год.

Но, і як там вам? Тримате ся свого, ци уж пристаєте на нашмарюваны монополистами чужы ідеолоґіі? Хоц часу збігло уж гейбы вельо, часом односит ся вражыня, што монополь має ся добрі. А Лемкы (в тым монополи очывидно) дают ся, хоц мают право і конечніст ся поставити.

Мы в радию ЛЕМ.фм сервуєме вам лем тот наш, рідный монополь. Без выдумуваня і смотріня за інчым.

І так монополистичні попросиме вшыткых на пятницьову передачу од Пряшова. Представиме сой днес особу Андрия Патруса, підкарпатского поеты, політика, члена чехословацкой воєнной місиі в СССР вчас ІІ світовой войны. В «Перличці» брат владыкы Павла Петра Ґойдича, Штефан Ґойдич, так само священник, в підкарпатскій ґазеті «НедѢля» зверне нашу увагу, же не мож лем науком позерати на світ.

«Книжниця» то тым разом гумореска од Михайла Клима. Заведе нас она до русиньского села, де собі учытеля выберали. «Припоминка» – припомянеме собі сентенциі на тему народной співанкы од вызначного русиньского фолклористы Михайла Гіряка.