«Триє авторы, дває сучасны. (…) Двох з них уж ніт медже
нами. Каждый інчый, досвідчаючый дакус інчый кавалец істориі Русинів зо свойой перспективы, хоц мінімум єден (по правді, єст іх о вельо більше) пункт найдеме доцна спільный – представити, омовити, скоментувати актуальну русиньску проблематику, не смотрячы на політичну коректніст, або потенцияльне згніваня неприхыльных».
Ден Русинів в Польщы
В тоту суботу, 5. грудня/децембра 2020 р., просиме на презентацию публикациі пн. «Перша ліґа парібків. Лемківскы публицистичны тексты» з текстами авторства Ваня Гунянкы, Петра Медвідя і Богдана Ґамбаля, выдавцьом котрой є Стоваришыня «Руска Бурса» в Ґорлицях.
З огляду на епідемічну ситуацию і звязаны з ньом рестрикциі подія буде заперта для публикы. Просиме позерати на онляйнову трансмісию на фанпейджы радия ЛЕМ.фм та слухати радия ЛЕМ.фм, на антені котрого так само буде проходила трансмісия. Початок 16.00 година.
Дата презентациі книжкы не єст припадкова. Як раз того дня празднуєме Ден Русинів в Польщы, схваленый Світовым Конґресом Русинів на памятку основаня Руской Народной Республикы Лемків. Кажда з держав, в котрій жыют Русины по цілым світі, выбрала сой єдну дату звязану з важном для іх істориі подійом, коли празднуют в себе Ден Русинів, прим. Русины на Словациі святкуют 12. червця/юнія, на Мадярах – 22. мая, а в Сербіі – 17. січня/януара.
Золотый Крест Заслугы Президента ПР для Богдана Ґамбаля
Головным пропаґатором і орґанізатором попередніх святкувань Дня Русинів в Польщы был Богдан Ґамбаль, вызначный лідер русиньского соспільства, якого несподівана смерт попереджена коротком хворотом взяла 2. липця/юлия 2020 р. Тогорічне свято Дня Русинів в Польщы мало быти в цілости му присвячене.
Рішыньом президента Польской Республикы Анджея Дуды Богдан Ґамбаль был на внесок Малопольского Воєводы посмертні угоноруваный державным одзначыньом – Крестом Заслугы I ступени, значыт Золотым Крестом Заслугы за выдатну діяльніст для розвитку лемківской меншыны в Польщы. Вручыня одзначыня заплянуване было на 5. грудня/децембра тр. Єднак пандемічна ситуация спричынила, што вшыткы того рода подіі треба было перенести на будучый рік.
Богдан Ґамбаль был тым, котрый вымриял сой печатати книжку з лемківскыма публицистичныма текстами. Повело ся му іщы выстарати (хоц аж за третім разом) о дофінансуваня проєкту выданя публикациі. Не повело ся уж єднак видіти выдрукуваной книжкы.
Гевсый допис отверат цитуваня зо вступного слова до книжкы авторства Демка Трохановского. Книжкы, котра неєдному буде перешкаджала, бо прочытати мож гын невыгідны слова, суровы опініі, нелегкы коментарі тыкаючы того, што діє ся в русиньскым світі, і звязаной з ним вшелеякой політикы. Але, же повторю за словами Демка Трохановского зо вступу, од того же єст публицистика – жебы скоментувати, оцінити, омовити, представити, зрецензувати ци даяк інакше представити.
Богдан Ґамбаль не боял ся великой і малой політикы, не боял ся отверті писати о справах, о котрых інчы воліли молчати. Подібні як тото робил Ваньо Гунянка і робит дале Петро Медвідь. То єдна з форм борбы о перетырваня русиньского народа, зато як раз праздник Дня Русинів є одповіднім моментом, жебы запрезентувати книжку шырокій публиці і голосно побесідувати о справах Русинів.
Коментарі