І Маґурскій Ультрамаратон

Не так давно інформували сме вас о можливости запису в старті в змаганях в літаню Лемковина Ультратрейль (до почытаня за тым мотузком). Тоты змаганя будут проходити на осін 2015, а мы приносиме вам тепер віст о змаганях, якы будут проходити скорше і тіж на Лемковині. Того рока 22. серпня перший раз одбуде ся Маґурскій Ультрамаратон на дистансі 81 і 42 км. Маґурскій Ультрамаратон то змаганя і для досвідченых літачів і для тых, котры допіро зачынают провірку своіх сил на гірскых трасах. Старт і мета сут в Крампній, а траса буде мала форму колеса, зато тоты початкуючы будут мочы самы рішыти, ци сут в силі летіти дальше, ци уж будут кєрувати ся до меты.

Зголошувати мож ся од 15. лютого на сайті орґанізатора – magurski.com. Максимальне чысло участників то 500. Орґанізатором І Маґурского Ультрамаратону є Фундация З Гіркы.