Заран, т.є. в суботу 21. мая, одбуде ся ІІ Біциґльовий райд, котрий пройде русиньскыма селами на західній Лемковині. Головныма цілями подіі, попри пропаґуваню здорового трибу жытя, ци популяризациі роверовой туристикы, єст тіж змога одвидіти лемківскы церкви, котры находят ся на Пути Деревяной Архітектуры.
Біциґлисты выіхают ок. 11.00 год. з Мушыны, одкале траса буде вела через такы нашы села як Лелюхів, Дубне, Війкова та Поворозник. Долгіст реченого райду то ок. 30 км і є то тзв. червений пут Мушыньской Туристичной Петлі.
Вчас райду участникы одвидят русиньскы грекокатолицкы храмы:
- церков св. Димитрия в Лелюхові з 1861 р.,
- церков св. Михала Архангела в Дубным з 1863 р.,
- церков свв. Космы і Даміана в Війкові з 1790/1792 р.,
- церков св. Якова в Поворознику, котрой ризниця датувана на 1600 рік, што дозвалят узнавати ю за єдну з найстаршых істнуючых лемківскых церкви. Од 21. червця 2013 р. находит ся на Листі Світовой Спадковины Юнеско.
Окрем церкви в Війкові, котру буде мож видіти лем ззовни, дальшы три храмы будут доступны до звиджаня од середины.
Більше інформаций і реґулямін райду найдете за тым мотузком.
фот. Каміль Палюшек, церков в Війкові
Коментарі