ІІ Змаганя Автентичных Музыків

Початком вересня/септембра в Щецінi будут проходити ІІ Змаганя Автентичных Музыків. До участи прошены сут музыкы, якы выконуют корінну народну музыку, як тіж музыкы інспіруючы ся традицийном музычном культуром – можут быти аматоры і професийоналисты.

Цілю конкурсу єст промоция польской та середньоевропейской музыкы спертой на традицийных джерелах. Минулого рока, вчас першой едициі конкурсу, до змагань приступило більше як 100 выконавців народной музыкы з ріжных кутиків Польщы, якы презентували ріжнорідны музычны традициі і новы інтерпретациі народной музыкы. Щеціньска Фільгармонія выполнила ся шырокым спектрум музычных кольорів – од реконструкциі, через фольк, джаз, аж по експериментальну музыку.

Змаганя проходят в штырьох катеґориях: інструментальных солистів, вокальных солистів, інструментальных або інструментально-вокальных ансамблів і співочых ґруп (до 6 осіб). Конкурсовы переслуханя будут проходити 2.-3. вересня/септембра, а лавреаты выступлят на симфонічній сцені фільгармоніі вчас фінального концерту 4. вересня/септембра. Жырі роздиспонує нагороды на суму аж 20.000 зл. Участ зголошувати мож іщы лем до 22. липця/юлия т.р.,  выполняючы простий формуляр.

Окрем конкурсовой части і концертів, орґанізаторы просят на чысленны товаришучы подіі, м.ін. показы фільмів, варштаты і, маючу великє заінтересуваня, танцувальну забаву Дім Танця. Дрібниці найдете на сайті орґанізатора за мотузком, а ниже позерайте на цікавий фільм, вказуючий урывкы з влонишньой едициі.