Іконы з Лемковины – без выходжыня з хыжы

Од недавна на сайтах Музею-Замку в Ланцуті мож обзерати здіґіталізувану колекцию Церковной Штукы. На домашнім компутері мож сводібні контемплювати вынятковы іконы, з якых барз велика част походит з Лемковины. Віртуальну прогульку можете провести клікаючы на тот мотузок.

Коли Лемковина остала позбавлена в 40. роках ХХ ст. більшости своіх жытелів, в великій загорозі нашла ся ціла церковна спадковина Лемків. Част выпосажыня церкви заберали выселяны Лемкы зо собом, але превелику част мусіли лишыти. Оставлены без опікы церкви нищіли, девастувано іх і рабувано. Жебы захоронити тото, што іщы остало, консерваторскы службы товдышніх воєвідств краківского і ряшівского, провели акцию забезпечаня церковного выпосажыня. Специяльні до того покликано до жытя в 1960 р. Воєвідску Складницю Рухомых Забытків в Ланцуті (яку пак названо Одділом Церковной Штукы Музею-Замку в Ланцуті). Там звезено більше як 1000 ікон (з XV-XX ст), 300 церковных книг і інчы захованы елементы церковного выпосажыня, напр. хоругви, кресты, літругічны начыня та інчы.

Експонаты сут під постійном консерваторском опіком і удоступляны для звиджаючых. Част выпосажыня по роках вернула на Лемковину – напр. іконостас в Котани.