Інновиця 2026 – два пункты, на котры вартат звернути увагу

Уж в найблизшый вікенд, од 3. до 5. вересня/септембра, Новиця зас замінит ся в сцену – стартує 19. едиция Театральных Стріч Інновиця, орґанізувана як што рока Стоваришыньом Приятелів Новиці. Проґрам, як все, густый: театр, танец, концерты, варштаты і стрічы з природом Маґуры. Того рока вашу увагу можут притягнути особливо два пункты проґраму близко звязяны з лемківскым середовиском.

В суботу о 14.00 год. на сцені вказаный буде спектакль «Три ябка» зреализуваный перед роком в рамках діяльности Стоваришыня «Руска Бурса» в Ґорлицях. Білеты сут дармовы – до одобраня в дни спектаклю в Фестівальовым Бюрі. То єдна з трьох позиций в тогорічным проґрамі, котра обнята єст безплатным вступом (обік четвергового «Зільника Анны Сенюк» і пятницьовых «Зберачів кости»), зато вартат заняти собі час кус скорше, жебы не забракло дакому місця.

«Три ябка» Руской Бурсы

Автором тексту і режысером єст Стано Білый, словацкій драматурґ і режысер звязаный м.ін. з Театром А. Духновича і авторскым театром Divadelný kabinet východňara. За драматурґію одповідат Петро Медвід, музику скомпонувал Матуш Павлик. В спектакли выступуют Івона Іскра Криницка, Моніка Тылявска і Наталия Малецка-Новак.

«Три ябка» то істория трьой сестер – Олены, Галины і Улькы, запертых в недоповідженым, білым просторі, деси в хыжы зо садом, в ближе неокрисленым часі «по войні», котра, як стверджат єдна з героінь – «не мала початку ани кінця». Червены ябка, што навязуют до біблийного мотиву дерева жытя і первородного гріху, стают ся в штуці гейбы четвертом постатю. Сестры мусят рішыти, жебы втечы – не перед войском, а перед страхом, же войско може вернути.

«Три ябка» то пєса, котра фунґує в рамках ініциятивы описуваной єй творцями як «театр внутрішньой войны». Тото окрисліня добрі оддає характер той реализациі – не іде о реконструкцию історичных подій, але, жебы пізріти до середины, на напятя, недоповіджыня, конфлікт.

Показ одбуде ся в Новици в камеральній сценериі сельской світлиці.

Анджей Жыґадло о «Деревци»

Другым пунктом, коло котрого не мож перейти обоятно, то суботня прелекция Анджея Жыґадла «Деревце. Образы погранича» (год. 17.30). Артиста буде бесідувал о образі, котрый намалювал в 2017 році з нагоды 70. річниці акциі «Вісла». Образ нашол ся на офіцийным плякаті цілолемківксых упамятнінь.

«Деревце» выросло з ілюстрациі, яку Жыґадло зрыхтувал до выданой через Бурсу книжочкы «Оповім Ти байку…», а конкретні до байкы Івана Русенка під тым самым наголовком – істориі о овочовым дереві, што го засадил лемківскій ґазда. Артиста дал сой звіданя, што з тым деревом діє ся днес, і одповіл образом здичілой, лишеной яблінкы в выселеным селі – типового елементу краєвиду Лемковины. В композицию вписал три медаліоны з симоволами сонця, місяця і черепа, якы безпосередньо навязуют до іконоґрафіі Розпятя Ісуса Христа. Лишене дерево стає ся тым самым деревом креста, а ціла сцена – метафором терпліня за чужы провины, з надійом на воскресіня.

Вартат припомнути, што образ мал свою наукову презентацию в квітни/апріли 2017 рока на Ягайлоньскым Університеті, підчас конференциі ´Акция «Вісла» – Лемкы, 1947-2017´. Суботня стріча з артисотм в Новици то нагода, жебы послухати історию образу і його значыня безпосередньо од автора.

Образ находит ся в колекциі Руской Бурсы і наштоден находит ся в сідибі Стоваришыня.