Актівности музею модерного уменя Енді Варгола в Меджілабірцях ословлюють шторік шыршу публіку. Кількость участных на подіях музею нароснув меджірічно о половину.
З великым успіхом стрітила ся і експозіція, котра приближовала жывот і творчость Варгола, з котров музей презентовав ся в Мадярьску. Словацьку аґентуру TASR о тім інформовав директор музею Мартін Цубяк.
19 выставок і много далшых проєктів
„Інтерес турістів і навщівників о творчость Енді Варгола росне нелем в нашім музею, але і на выставках, котры орґанізуєме і застрішуєме, ці то на теріторії Словакії або і в загранічу,“ повів Цубяк.
За його словами чісло участных на подіях, котры Музей модерного уменя Енді Варгола зорґанізовав у 2019-ім році, было 23 239. Рік перед тым, як доповнив про порівнаня, мав музей на своїх подіях 16 842 навщівників.
Варголів музей зреалізовав в попреднім році 13 выставок у своїх просторах і далшых шість екстерно. Окрім того приготовило ся множество вытварных воркшопів, лекцій, резіденцій і так само аніматорьскый сімпозій. Найвекшый інтерес у 2019-ім році быв за словами Цубяка окрім головной експозіції творів Енді Варгола і о выставкы з ціклу Warhol Tour, котры было мож видіти в Левочі, Пряшові і Бардейові.
„Успішнов презентаційов музею, реґіону але і Словакії была выставка в Мадярьску, в Музею Мігаля Мункачія в Бекеш Чабі з назвов Енді Варгол – На стріберній пути од колыскы по… свойов высоков навщівностьов 12 387 людей і медіалізаційов,“ повів про аґентуру директор. За успіх музею бере і інавґурацію творів Енді Варгола, Дейвіда Гокні, Стіва Кауфмана і умелця, котрый творить під псевдонімом Банксі. Інавґурація проходила в Меджілабірцях на кінцю 2019-го року, почас ньой ся покрестили і дві публікації під назвами Factor-Y і MMUAW 2.0.
Три стабілны експозіції
Музей має про навщівників три стабілны експозіції. Окрім найвекшов, котра приближує вшыткы важны творчі періоды Варгола включно його домінантных вытварных тем, є там і експозіція презентуюча артефакты, документы і фотоґрафії зо жывота умелця, а так само і выставка презентуюча веце умелців поп-арту, стріт-арту, котры Енді Варгола особно знали, іншпіровали ся ним, або надвязали на його прямый умелецькый одказ.
ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА
Коментарі