Йоганн Адольф Гассе был єдным з выдатных представників неаполітаньской епохы. Кіньцом жытя достосувал свою музику до музикы епохы клясицизму. Был Гассе в своіх часах вважаный за єдного з найбільшых німецкых композиторів.
Вродил ся в 1699 р. Берґедорфі недалеко Гамбурґа, там отец навчыл го основ музикы. Обдареный гардым тенором посвятил ся співочій карєрі. В 1723 році дебютувал як композитор. Едукувал ся в Італиі. Гассе стал ся популярный і зачал компонувати для королівской оперы в Неаполи. В 1726 році выіхал на обізд цілой Італиі. В Венециі познал ся зо знаном співачком Фаустіном Бордоні, в котрій ся залюбил і котра ся пак за него выдала.
В 1731 році король Польщы Авґуст ІІ Сильный запросил супружество до Дрездена. Гассе менувал королівско-польскым і електорско-саксоньскым капельмайстером. Гассе остал гын два рокы, пак вернул до Італиі, одкале перенюс ся до Лондону. Вкінци зас вернул до Дрездена на долшый час, пак до Відня, а вмер в 1783 році в Венециі, де перенюс ся на желаня жены.
Його творы то 120 опер, вельо ораторий, кантат, месс і розмаіты інструментальны творы. В проґрамі выслухате м.ін. сонату но 5 мі-мінор, фраґменты реквієм до-мажор, сонату фа-мажор та знаны творы од інчых клясиків.
Коментарі