Календар подій Стоваришыня Лемків на 2020 рік

Хоц є уж третій місяц рока, публикуєме про Вас календар подій Стоваришыня Лемків на 2020 рік, котрый подал Головный Заряд орґанізациі. Найважнійшы акциі орґанізуваны стоваришыньом проходят все в другій половині рока, але рыхтуваня до декотрых з них уж тырвают.

В тым році, окрем шторічных подій, одбуде ся і креницкє Бієнале. Подля дат, СЛ в 2020 р. зорґанізує:

• 23.-24. мая – ХІ Медженародне Бієнале Лемківской/Русиньской Культуры в Креници (орґанізує креницкій Кружок СЛ);
•  7.-8. серпня/авґуста – Ювілейну ХL Лемківску Ватру на Чужыні в Михалові;
•  10.-11. жолтня/октобра – XXVI Лемківску Творчу Осін (орґанізує креницкій Кружок СЛ);
• листопад/новембер (точна дата не єст іщы знана) – ХIV Стрічы Трьох Поколінь з Лемківском Культруом в Пшемкові (орґанізує пшемківскій Кружок СЛ);
• листопад/новембер (точна дата не єст іщы знана) – ХХVІІІ Стрічы з Лемківском Культуром в Ґожові Великопольскым (орґанізує ґожівскій Кружок СЛ);
• 5. грудня/децембра – Ден Русина в Польщы – 102. річниця віче во Фльоринці, якє дало початок Рускій Народній Республиці Лемків.

В рамках річной діяльности СЛ выдає двомісячник «Бесіда», якій безперерывно выходит од 1989 рока. Орґанізация выдаст і «Лемківскій Річник 2020», котрый як каждый рік приведе основны річниці і ювілеі з русиньской істориі. Окрем того, в поєдных Кружках Стоваришыня Лемків можут быти орґанізуваны і другы акциі, про котры – кєд буде шыршый анонс – будеме інформувати.

В основну діяльніст Стоваришыня Лемків вписує ся і діяльніст двох ансамблів. То Лемківскій Ансамбль Пісні і Танця «Ластівочка» з Пшемкова і діюча при ним ґрупа «Ластівчата», та Фольклорный Ансамбль «Розтока» з Рудной. Пшемківскій Кружок СЛ реалізує тіж річный проєкт «Наша світлиця».

Вшыткы проєкты реалізуваны сут завдякы дотациі Міністра Внутрішніх Справ i Адміністрациі.