Карпаторускє оружне рамено

Ілюструваний курєр штоденний, покликуючы ся на заграничну пресу, приносит віст, яка годна змінити ґеополітичну ролю Карпатской Руси на ґлобальну міру.

До списку заслуженых для розвитку оружного рамена дописуєме єдного кытайского маршалка Фенґ-Хю-Сяна – которго наштоден зовут християньскым маршалком. Войсковий же родом єст зо села Быстра на Підкарпатскій Руси, а його няньо, Іриней Фенгей, хоц Мадяр за походжыньом, был в селі грекокатолицкым попом. Дале журналиста пише, што будучий славний войсковий не хотіл ся вчыти лем подорожувати по світі. Коли мат 16 років, втікат з хыжы, в італияньскым порті вербує ся на шыф і іхат глядати золото на Аляску. Потім, як надзвычайні схопний, остає американьскым войсковым.

Во 1910 р. воює в повстаню боксерів в Кытаю і остає войсковым інструктором при кытайскій арміі. Самособом, проявлят і тепер надзвычайны можливости карпаторуского оружа, воюючы против ґенералови Мо. Редакция поміщат речену інформацию про славного Русина і лем хоче зазначыти, што в 1910 р. в Кытаю не проходило ниякє повстаня боксерів.