Катастральны мапы Лемковины доступны в інтернеті

Місяц тому інформували сме вас, же Державний Архів в Перемышли опубликувал наступну част архівальных материялів, котры м. ін. презентуют метрыкальны книгы з грекокатолицкых парафій на Лемковині з років 1777- 1913. Полну інформацию найдете за тым мотузком.

Не єст то конец доступных од рукы архівальных материялів – Державны Архіва в Польщы дальше ся діґіталізуют і фурт удоступняют новы збірникы.

Од долшого часу доступна єст част катастральных мап великого фраґменту Лемковины. Катастры, котры найдете на сайтах архівів, походят з ХІХ ст. (Лемковину зевіденцийонувано медже 1844 а 1854 роком) і споряджено іх в звязку з заявом цисаря Франца Осифа з 1785 рока, котрий хотіл зреформувати податковий систем, до чого необхідным было докладне обміряня земель, окрисліня іх якости та вытычыня актуальных границ ґмін, сел, ґаздівок. Катастры были роблены барз докладні і сумлінні, найти мож на них:

границі ґмін,

• границі ґрунтів, з выокремліньом ріль, загорід, ук, паствиск, винниц, лісів, полонин, ґрунтів під забудову, нехоснуваных земел,
• желізниці, вшыткы можливы дорогы (публичны та приватны), рікы, поточкы ітд.,
• вшыткы будинкы і будовлі, тіж мосты, придорожны крести, капличкы та інчы.

Част мап, обнимаючых села Лемковины, найдете на сайті Державного Архіву в Перемышли. Зобрано іх в єдній табельці зо вшыткыма доступныма катастрами. По высмотріню інтересуючого нас села, треба клікнути в номеркы попри назві мапы (смотр – фото пониже) і вказує ся доступний комплет мап для даного села. Цілий комплет мож записати на свій компутер.

Друга част мап находит ся на сайті Державного Архіву в Кракові. По выбраню Ґаліцийского Катастру треба перейти до одповідньoй закладкы – Series, де вкажут ся нам можливы до выбраня катастры выбраных обшыри. Лемківскы села найдете выбераючы Катастер Ясло і Катастер Новий Санч. По выбраню села отверат ся нам комплет мап, і подібні як на попереднім сайті – цілу мапу мож записати на своім компутері.

До вшыткых мап споряджено іщы тзв. операты, то значыт докладны описы мап з приписаньом номерів ґрунтів до властителів. Дотепер, не остали они іщы здіґітализуваны і жебы ся дознати, чыя была дана земля, треба выбрати ся до архіву,  або звідати ся дакого з дідів. Може, жк раз, будут памятати 😉