Вмер академічный малярь Андрій Смолак. Родак із Старины

Як інформовало місто Снина, в пятніцю 12-го юна 2026-го року у віці 72 років вмер академічный малярь Андрій Смолак. Быв нелем малярьом, но і ґалерістом, културно-общественным діятельом, актівный быв головно в Снині, де жыв.

Андрій Смолак народив ся у 1953-ім році в Гуменнім, дітинство і молодость пережыв у русиньскім селі Старина, в окресі Снина, котре днесь вже не існує, і на його місці збудовали водный резервоар.

В роках 1974 аж 1979 штудовав на Катедрі вытварной выховы Філозофічной факулты Універзіты Павла Йозефа Шафарика в Пряшові, в році 1989 абсолвовав міморядны штудії на Академії вытварных умень в Празі.

Мальовав пейзажы, портреты, акты. Робив акварелы і штруктуры. Намальовав понад 6000 образів, і од 1982-го року зорґанізовав понад 70 персоналных выстав на Словакії, в Чеській републіці, Німецьку, Польщі, Швейцарії, Австрії, на Україні, в Білоруси і Росії.

Образы Андрія Смолака суть в ґалеріях і пріватных збірках в многых европскых країнах, але і в США, Японії, Кітаю, Южній Кореї, Казахстані ці Австралії.

У 1993-ім році основав у Снині філію ґалерії MIRO, котру в Берліні а пак і в Празі основав його брат Міро Смолак. В році 2004 тота ґалерія змінила назву на Galéria Andrej Smolák, а пізніше отворив їй філію і в Братіславі.

Довгы рокы в Снині вів свою пріватну основну умелецьку школу, де мальовати учів діти і дорослых. Так само довгы рокы в місті орґанізовав меджінародный вытварный фестівал, вдяка котрому до Снины і околіці притягнув стовкы умелців із многых країн світа.

Андрій Смолак выдумав дакілько успішных проєктів, меджі котрыма мож спомянути Намалюй свого мотыля або Мальованый ровник.

Голосив ся ку свому русиньскому походжіню, ходив на русиньскы події ці на выступліня Театру Александра Духновіча. Якраз недавно, при святковню 80-го юбілея ТАД, в рамках святочного проґраму одбыла ся у фоає театру і выстава протретів акторів, котрых автором є Андрій Смолак.

За свою плодну роботу здобыв почас жывота многы нагороды, меджі котрыма мож спомянути Премію Франца Кафкы (1998 р.), Премію Европской унії уменя (2002 р.), Світову премію Салвадора Далі (2003 р.) ці Премію Артіста Аґналато (2008 р.).

Снина і русиньска комуніта на Словакії стратила смертьов Андрія Смолака актівного орґанізатора културного жывота. Вічная память!