Хоакін Родріґо, «З повагом», просит Павел Малецкій – неділя, 20.00 год.

В 1901 році вродил ся Хоакін Родріґо, автор єдной з найбарже розпознавальных мелодий в істориі музикы. Його «Concierto de Aranjuez» є, подля вельох джерел, найчастійше граном композицийом написаном в ХХ ст.

Хоакін Родріґо был передовым іспаньскым композитором ХХ столія, для світа стал ся символом і квінтесенцийом іспаньской музикы. Нич тото ся стало, малого Хоакіна стрітила траґедия. В наслідстві хвороты осліп, мал лем три рочкы. По роках бесідувал, што тота подія привела го на дорогу музикы.

Композиторскы студиі одбыл в Парижы. Скоро присвоіл нюансы оркєстрациі і выпрацувал свій спосіб гармонізуваня мелодий – привидні традицийный, але все забарвленый чужыма звуками, котры рішают о силі діяня той музикы. Родріґо мал предовшыткым неповторный мелодичный талант, сильно осадженый в рідній традициі.

Хоакін Родріґо є автором симфоній, сарсуелий (традицийна форма іспаньского співограня), концертів на фортепіан, флет, гушлі, арфу, дві і штырі ґітары, пісен, камеральной музикы.

Як знак пошаны і узнаня за заслугы для іспаньской культуры король Хуан Карльос І надал му спадкове званя маркіза в загородах Аранхуесу. По смерти композитора, в 1999 році названя тото перешло на дівку Цецилию.