Хоц до яри іщы кус, а до літа іщы дале – хочеме уж тепер поінформувати про даты трьох найбільшых русиньскых подій, котры будут проходити того рока. Кажда з них принесе нам вельо атракций, но вартат тот приємный час уж тепер сой заплянувати.
То за шором спомяну на Русиньскій Фестіваль во Свиднику (25.-31. мая), котрый буде тырвал аж тыжден, Русиньску Ватру на Малым Липнику (10.-12. липця/юлия) і Лемківску Ватру на Чужыні, котра каждого рока одбыват ся в Михалові (7. -8. серпня/авґуста).
Свидницкій фестіваль
Русиньскій Фестіваль во Свиднику єст найбільшым русиньскым фестівалом во світі, а до того найдолше тырват. Тогорічна, VIII едиция буде проходити од 25. – 31. мая. Як што рік, через цілый тыжден проходити будут чысленны культурны і освітовы акциі. По інчы рокы были то авторскы стрічы, літературны вечеры, русиньскы театральны пєсы ци выставы.
Найвеце пубикы притігат все вікендова част, котра зосереджат ся на концертах в свидницкым амфітеатрі. І того рока не бракне артистів, котры плекают русиньску музыку. Знаме уж, што в суботу, 30. мая на сцені амфітеатру, в головным блоку, выступлят окрем інчых, єдиный професийный русиньскій ансамбль ПУЛьС з Пряшова, вызначна співачка Ганка Сервіцка, ґрупа Конябой з Вышкова на Моравах ци ансамбль Руской Бурсы з Ґорлиц – ґрупа Терочка. Такой буде то уж другій выступ Терочкы на свидницвцкій сцені.
Радийо ЛЕМ.фм буде медияльным партнером вышткых вшыткых фестівальовых подій.
Ватра на Малым Липнику
Другом з великых русиньскых подій, котра так само одбыват ся на Пряшівскій Руси, є шторічна Русиньска Ватра на Малым Липнику над Попрадом. ХІ Ватра одбуде ся через вікенд 10. – 12. липця/юлия.
Покля неє іщы детального проґраму, звідали сме орґанізатора фестівалю – Петра Штефаняка, про тогорічны пляны. «Дашто уж знаме про тогорічны ансамблі, але то іщы почекайме. Як буде плякат то товды вшытко уж буде готове» – бесідує Штефаняк. Додал, што режысерия проґраму буде подібна до той з попередніх років. «Може буде веце атрацкий і проґраму про самы діти» – кінчыт.
Русиньску Ватру як головный орґанізатор реалізуют: Здружыня Молоды Русины, село Малый Липник і фольклорна ґрупа Рутенія. Николи не бракує на ній фольклорных русиньскых ансамблів, але і тых модерных. Єдном з вельох атракций є запаліня великой ватры. і показ фаєрверків.
Ювілейна Лемківска Ватра
40. Лемківска Ватра на Чужыні одбуде ся традицийно в першый вікенд серпня/аґуста. Того рока то 7.-8. серпня/авґуста.
Єст то найвекша лемківска пленерова подія в Польщы, котра окрем фестівальового характеру, все старат ся підримувати патріотичного духа серед Лемків. Ювілейна Ватра в Михалові, як каждый рік притягне ансамблі ріжного жанру. Орґанізаторы на ювілейный фестіваль плянут запросити тоты ансамблі, котры за остатні рокы найвеце сподабали ся його участникам.
Окрем концертів на михалівскым ватряным поли не бракне товаришучых подій. Буде напевно емоцийна дебата, выставы, промоциі выдавництв ци спортовы змаганя.
Коментарі