Коморно і монументално з Федором Віцом

Як інформовала Анна Симкова, в Словацькім народнім музею – Музею русиньской културы в Пряшові одбуде ся в четверь 3-го октобра 2024-го року вернісаж выставы творів Федора Віца під назвов Коморно і монументално. Выстава з мало познатой творчости познатого автора.

Выстава є присвячена 80-му юбілею народжіня познатого русиньского каріактурісты і актівісты, котрый одсвяткує в новембрі того року.

Федор Віцо (9. 11. 1944 р.) є родаком із села Шапинець. Родічі были учітелі. До основной школы почав ходити в Меджілабірцях, де втогды родічі учіли, але пак быв і на основній школі в Празі, Зволені і Братіславі, де пізніше абсолвовав різбярьске одділіня на Середній умелецькій школі Промыслу.

Уж почас тых штудій, як 15-річный, почав публіковати кресленый гумор, наперед в часописі Roháč, а поступно в многых далшых періодіках. У 1960-ых роках быв знамый головно його збійницькый серіал Dereš. І вдяка тому Віцови пак заборонили публіковати.

В часі забороны Федор Віцо выставльовав на конкурзных переглядках кресленого гумору на Чехах і в загранічу.

На початку такзваной „нормалізації“ в Чехословакії членове комісії провіріня при Словацькім фонді вытварных умелців у Кошыцях заховали ся статечно і поставили ся за Федора Віца. І так міг надвязати співпрацу з архітектами і почав реалізовати дакотры вытварны діла в архітектурі.

Меджітым занимав ся і коморнов мальбов, з якойсь внутрішньой потребы, бо жыв головно з роботы на монументалных творах. Федор Віцо на выставі Коморно і монументално. Выстава з мало познатой творчости познатого автора представить часть свойой часово ограніченой вытварной творчости, котра є майже непознатов, што може быти нелем інтересным, но і приємным несподіваньом.

Вернісаж выставы почне о 16.00 год., і експозіцію буде мож видіти до 2-го новембра того року.