25-го октобра 2019-го року одбуде ся в просторах Вседержавной бібліотекы загранічных языків в Будапешті Конференція памяти Іштвана Удварія. Конференцію орґанізує Бібліотека Русинів Мадярьска імени професора Іштвана Удварія.
В рамках конференції буде мож выслухати рефераты Ілдікы Поласкіне Надош, Андраша Золтана, Ержейбет Барань Комарі, Ренаты Романюк, Мігаля Кочіша, Михаіла Капраля і Юдіты Удварі. Подію підпорив Фонд Ґабора Бетлена.
Іштван Удварі
Славіста і педаґоґ Іштван Удварі народив ся 14-го юлія 1950-го року в селі Торньошпалца в Мадярьску. У 1975-ім році закінчів Універзіту Лайоша Кошута в Дебрецині, доктором філозофії быв од 1986-го року. Професуру здобыв у 1995-ім році. Од року 1997 быв членом Мадярьской академії наук. Удварі од 1982-го року выкладав російскый, україньскый і русиньскый язык на Высшій педаґоґічній школі в Ніредьгазі, де у 1992-ім році засновав Катедру україньской і русиньской філолоґії. Фунґовала до року 2013.
Удварі інтересовав ся аналізов русиньскых текстів, головно тых, котры односны суть ку періоду до 19-го столітя, і котры ся му подарило найти в мадярьскых архівах. Окрім іншого приготовив до друку дакілько томів рукописів русиньского історіка Антонія Годинкы, репрітны выдань букваря Мануіла Ольшавского, букваря Івана Куткы і много далшых. Так само працовав над языком і літературов Русинів Войводины. Професор Іштван Удварі вмер в Ніредьгазі 9-го новембра 2005-го року.
ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА
Коментарі