Конференція ку 20-ом рокам высокошкольской русиністікы

Русины на Словакії припоминають собі тот рік два юбілеї повязаны з высокошкольсков русиністіков. Інштітут русиньского языка і културы Пряшівской універзіты в Пряшові із той нагоды рихтує меджінародну научну конференцію.

Перед двадцятьома роками зачало діяти на Пряшівскій універзіті в Пряшові Одділіня русиньского языка і културы під втогдышнім Інштітутом реґіоналных і народностных штудій. По десятьох роках із одділіня вытворив ся Інштітут русиньского языка і културы, котрый днесь належыть під Центер языків і култур народностных меншын. Інштітут днесь забезпечує бакаларьскы, маґістерьскы і докторандьскы штудії.

Тоты юбілеї русиньскый інштітут припомяне собі конференційов під назвов 20 років высокошкольской русиністікы на Словакії. Конференція на Пряшівскій універзіті одбуде ся в днях 17-го аж 19-го октобра 2018-го року і буде мати три тематічны секції.

Першов темов є Высокошкольска русиністіка і статус русиньского языка на Словакії і в загранічу в шыршім славістічнім контексті, другов темов буде Література, култура і школство Русинів по році 1989. Конференція буде занимати ся і темов Цівілны і церьковны орґанізації і одборны інштітуції в народно-ідентіфікачных процесах Русинів.

Рефераты, котры буде мож выслухати на конференції, будуть опублікованы в рецензованім зборнику.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА