Конференцийно-ювілейний Гокус Покус – пятниця, 20.00 год. (нажыво)

Пряшівскій Університет і його Інститут Русиньского Языка і Культуры єст днес бодай найбільшым і найактивнійшым центром русиністикы во світі. Окрем штоденной роботы, звязаной з процесом едукациі студентів, одбывают ся там науковы конференциі, выклады, семінары і другы стрічы, обнимаючы проблематику русиньского языка і культуры. В днях 3.-4. листопада/новембра т.р. проходила в Пряшові медженародна наукова конференция пн. «Динамічны процесы в сучасній славістиці», котра была присвячена 20. річници лекторату болгарского языка на Пряшівскым Університеті і 80. уродинам выдатного языкознавці і педаґоґа, кодифікатора русиньского літературного языка на Словациі, доц. ПгДр. Василя Ябура, к.н. Як раз тому выдатному русиністі буде присвячений днешній Языковий Гокус Покус, в котрым схоснуєме выповіди о ювіляті, выречены вчас конференциі на Пряшівскым Університеті.

Языковий Гокус Покус – радийовий проґрам про русиньскій язык во вшыткых його аспектах і просторах. Премєра нажыво – в пятницю 4. листопада/новембра 2016 р. о 20.00 год., повторіня о ден – о 2.00, 5.00 і 16.00 год. за лемківскым часом. Лем в радию лем.фм!