Концерт церковного хору в Креници

В четвер, 28. мая т.р., в православній церкви св. Владиміра в Креници буде проходил концерт церковной музыкы. Выступит церковний хор креницкой парафіі, під батутом Петра Трохановского.  Початок о 16.00 год.

Парафія св. Владиміра Великого в Креници была ериґувана декретом митрополиты Василия 1. червця 1981 р. Церков остала воснесена в роках 1983-1996, посвячена 8. вересня 1996 р. в чест св. Владиміра, Крестителя Руси. Храм свойом архітектуром, хоц модерном, має навязувати до тридільных лемківскых церкви. Плянувана єст розбудова вежы – дзвінниці, на котрій буде поставлена найвысша баня. Першым парохом в Креници был о. митрат Василь Ґалчык (днес спілпрацовник радия лем.фм – автор проґраму “Церковна гомілетыка”), а од 2006 р. креницкых православных вірных веде о. прот. Петро Пупчык. Од моменту основаня парафіі дяком і дириґентом церковного хору єст Петро Трохановскій.

Креницка парафія єст єдном з невельох в Польщы, в якій декотры фраґменты Службы Божой (св. Євангелия і Апостол) чытаны сут в лемківскым языку. В церкви находит ся таблиця, написана в лемківскым языку, інформуюча о вознесіню храму в роках 1983-1996.

фото: Фейсбук