Концерты церковной музыкы на Лемковині

В днях 4.-5. липця/юлия одбуде ся цикль концертів церковной музыкы на териториі Лемковины пн. Церковна музыка в Низкым Бескіді. Концерты одбудут ся в штырьох православных храмах, находячых ся на середніх та західній крайцях Лемковины.

Специяльным гостьом тогорічной едициі буде Православний Хор Духовеньства Зеленогірского та Любіньского Деканатів, котрий приіхат зо західніх земель Польщы. Хор выступит під ведіньом Даниіла Ґалчыка, а перший концерт одбуде ся 4. липця/юлия о 16.00 год. в церкви св. Михала в Высові. Одтамале, того самого дня хористы підут до Білянкы, де в новопобудуваным храмі Покровы Пресвятой Богородиці і Почаівской Іконы Богородиці од 18.00 год. дадут свій концерт. О ден (5.07) другій шор концертів зачне ся од 16.00 год. выступліньом в креницкій церкви св. Владиміра Великого. Пак, останій концерт одбуде ся од 18.30 год. в Ґорлицях, в храмі Св. Тройці.

Хор Духовеньства Зеленогірского та Любіньского Деканатів Православной Вроцлавско-Щеціньской Єпархіі складат ся головні зо священників, котры служат часто на лемківскых парохіях на чужыні. Влони хористы награли платню в різдвяныма колядами, на котрій находит ся 17 творів. Сут то, окрем традицийных мельодий, і авторскы опрацуваня на вельоголосовий мужскій хор. Награня были проводжены в церкви св. Михала в Пшемкові, а мікс та мастерінґ выконал теперішній ведучий Общества Руска Бурса і редактор технічний лем.фм – др інж. Павел Малецкій.

В звязку з тым, же хористы наштоден жыют в ріжных, часом барз оддаленых од себе частях єпархіі, найчастійше мож іх почути, коли прикрашают співом кєрмешы в поєдных парафіях, або специяльні рыхтуют дакій святочний концерт. В склад хору входят: о. Ігор Попович (Пшемків), о. Любомир Воргач (Ліґниця), о. Славомир Сороканич (Стодоловиці), о. Марко Боніфатюк (Зґожелец), о. Андрий Дудра (Зелена Гора), о. Богдан Репела (Любін), та як дириґент Даниіл Ґальчык.

Платню мож придбати на портали лем.фм – за тым мотузком. Більше інформаций долов на залученым афішы.