Центр Культуры Замок в місті Лесьніца (західня част Вроцлавя) стане ся частю великого театрально-музычного видовиска. 12. липця т.р. буде гын выставлений спектакль пн. Королева босорок: Сон літньой ночы в режысериі Михала Знанєцкого в циклю Голос Выключеных, реалізуваным Фундацийом Ютропера во спілпрацы з Фестівальовым Бюром Імпарт 2016.
Видовиско буде проходило подля авторского сценария Михала Знанєцкого на основі драмату Шекспіра, барокову музыку Генри Пурселя і ново одчытаны фольковы музычны виды. В спектакли выступлят не лем звізды, але тіж сеньоры, молодіж і запрошены меншыны, жыючы во Вроцлаві – Лемкы, Украінці і Грекы, якы запрезентуют фраґменты пєсы, одчытаны подля свого культурового коду. Сценом буде парк в Лесьніцы попри Замку.
Завдякы тому, же в штуці берут участ любителі в ріжным віку і особы, якых діткнуло соспільне выключыня, самы они стают ся творцями культуры, а не лем єй інертныма адресатами. В Королевій… буде мож видіти професийных акторів, співаків і музыків, м.ін. знаного польского режысера Марка Котерского з женом Марґаритом Боґданьском і сыном Михалом Котерскым. Выступит тіж оперова співачка Каріна Скжешевска ци знана вокалістка Меля Котелюк і вельо музыків з цілого світа. Пєсу завершыт премєровий показ фонтанны і водных екранів. Початок – неділя 12. липця о 21.00 год. Білеты мож придбати в Центрі Куьтуры Замок в Лесьніцы.
(фото: пресовы материялы орґанізатора)
Коментарі