Краса надпопрадской долины вказана в Жеґєстові

Од 2. лютого/фебурара 2018 р. в Жеґєстові мож позерати на выставу фотоґрафій Павла Дуляка, презентуючу красу західньой части Лемковины, коли то, зачынаючы о 16.00 год., одбыл ся вернісаж в філиі мушыньской бібліотекы в Жеґєстові.

Орґанізатором подіі являт ся Публична Бібліотека Міста і Ґміны Мушына довєдна з Товаристовм Приятелів Жеґєстова. Выстава мат наголовок «Маґічний Жеґєстів». На знимках Павла Дуляка найчастійше представлена єст краса природы західньой части Лемковины і памяткы русиньской архітектуры, якы доднес мож видіти в надпопрадскій долині. Сам автор прожыват в тым русиньскым селі, якє положене є на граници Лемковины і Пряшівской Руси.

Жеґєстів сусідує з русиньскым Сулином. Тоты два села лучыт одкрыта про вшыткых лавка (Лавка Спілпрацы і Розвитку Погранича) над Попрадом, яка была побудувана в 2014-2015 рр. Рекомендуючы одвиджыня того села Русинам з Пряшівщыны вчас выставы, при нагоді заохочаме одвидіти місцеву грекокатолицку церков св. Михала Архангела (возн. 1917-1925 рр.). В селі народил ся тіж грекокатолицкій священник о. Петро Сандович (1858-1914) – парох Брунар, Яшковы і Чaрной, вызначний діяч Сандецкой Руси.