Крог про карпатску культуру

Карпатскє Товариство просит 16. листопада/новембра на стрічу з дослідником культуры гір, етноґрафом, публицистом ай тлумачом – Антонийом Крогом. Як мотто листопадовых Карпатскых Стріч выбрано выімок з книжкы «Склеп культурных потреб» Крога: Карпатску культуру спілтворили найрозмаітшы люде – каждий ся докладал, каждий брал, а рахунків не ведено […].

Крог менуваний є специялистом в обшыри карпатской культуры і про ню як раз буде розповідал. Вчас авторской стрічы буде мож придбати найновшы номеры Карпатского Альманаху «Плай» ай посліднє выданя книжкы «Склеп культурных потреб по ремонті».

По річній перерві до Музею Землі ПАН в Варшаві вернули Карпатскы Стрічы. Стріча з Антонийом Крогом є єдном з парьох, што на переломі 2017/18 рр. сут орґанізуваны Карпатскым Товариством в рамках той подіі. Перша проходила 19. жолтня/октобра і была присвячена часописови «Плай», котрий того рока святкує свій 30. ювілей. Стрічы товаришыл вернісаж выставы «Плайови оповісти, значыт три декады з Карпатскым Альманахом». Серед выставовых плянш явили ся і дві про Лемковину. Мож было найти на них знимкы двох персон заслуженых лемківскій темі, а то др габ. Олены Дуць-Файфер та Антония Крога. Речену выставу буде мож обізрити вчас найблизшой стрічы. 

Подія пройде в Музею Землі Польской Академіі Наук в Варшаві. Початок о 18.00 год.