Крок там і два назад

Україньско-мадярьскы односины уж даколи вызерають як танець, в котрім ся крок рушыш допереду, а пак два назад. Навеце собі іщі з партнером поталабате по ногах. Но все ліпше, як нияк не танцьовати і стояти самому на місці.

Тот тыждень одбыла ся стріча міністрів загранічных діл Україны і Мадярьска – Дмитра Кулебы і Петра Сіярто. Продовжовала теленовела, в котрій ся рішають, як в каждій теленовелі, односины. Лем в тім припаді односины двох держав, з котрых єдна має наверьх.

Мадярьско одкрыто бісідує, же буде блоковати Київ в зближованю з НАТО і Европсков унійов, покля не будуть сповнены пожадавкы што до охраны меншыновых і языковых прав. Самособов, в Будапешті іде першорядо о Мадярів у Закарпатьскій области Україны, але законы мусять быти єднакы про вшыткых, значіть Будапешть свойов ініціатівов помагать і охрані далшых меншын.

Україна зясь все обіцять, же вшытко буде в порядку, мадярьска меншына ся ничого не мусить бояти, і надіять ся, же Будапешть одблокує приступы.

Пак ся раз за час представителі стрітять, декларують, же односины будуть ліпшы, жебы такой потім єдна або друга сторона їднань не розъїла дачім свого сусіда, і вшытко знова скінчіть на мертвім пункті. Лем з тым розділом, же Мадярьско є тото, котре може блоковати, а Україна є тота, котра блокована є. Значіть, гірша сітуація про Київ.

І теперь то не было іншак. По стрічі міністрів то было повне оптімізму. Подля Кулебы, як повів на сполочній пресконференції зо Сіяртом по їднаню, головнов перешкодов про розвиток україньско-мадярьскых односин суть лем емоції і підозріня.

Кулеба навеце повів, же не суть жадны причіны бісідовати о мадярьскім сепаратізмі, не є причін ани бісідовати, же Україна хоче шкодити закарпатьскым Мадярам, тадь „сьме єднов країнов, єднов сполочностьов, і так буде навсе.“

Далше сьме ся дізнали, же до тых односин треба ставляти ся з горячім сердцьом, але холоднов головов, і шеф україньской діпломації одсуджує будьякы проявы зневажованя мадярьской комуніты на Україні.

Доколи вшытко тото буде платным, коли знова буде в тых односинах холодне сердце і горяча голова, то тяжко повісти, але по вшыткых скушеностях знаме, же красны слова все суть лем до часу, пак знова метають ся словны томагавкы меджі двома сусідьскыма столицями.

Но увагу хочу звернути на іншу проблему. Кедь так чоловік слухать Дмитра Кулебу, як ся перед Петром Сіярто высловлює о мадярьскій меншыні, аж бы на момент увірив, же чує міністра цівілізованой европской державы. Но барз скоро собі спомяне, же, по перше, іншу можность не мать, бо Київ не хоче блокаду, а по друге, хыбить тому універзалный прінціп.

Покля не видить Кулеба причіны бісідовати о мадярьскім сепаратізмі і одсуджує будьякы проявы зневажованя мадярьской комуніты, чом ся пак єднако не справує односно Русинів?

Ці Русины через свої домашні, але і меджінародны орґанізації малораз декларовали, же нич довєдна зо жадным сепаратізмом не мають? Же хотять жыти мірно, але так само хотять быти, єднако як і в іншых державах, де тыж Русины не торгають свої країны, акцептованы зо вшыткыма правами як окрема народностна меншына? Ці Русины малораз были зневажованы, означованы за субетнос, їх флаґ означованый за сепаратістічный – без причіны, докінця публічно спаленый, же Кулеба не має чом ся озвати ку зневажованю Русинів?

Кебы сьме мали бісідовати о зневажованю даякой народности на теріторії Закарпатя, і кедь мадярьска комуніта то там так само не мать даколи легке, єднозначно в тім мать смутный рекорд русиньска меншына. Лемже Русины не мають державу, котра бы могла блоковати Україну в даякых амбіціях, і так Кулеба, так як вшыткы влады од 1991-го року, то мать аж десь. І зато не вірьме ілузії о добрім шефови діпломації, котрому залежыть на даякій меншыні, вірьме лем реаліті о добрім шефови діпломації, котрый мать діпломатічны высловы. Часто барз далекы од реаліты.

Україньско-мадярьскы односины вызерають як танець, в котрім ся рушыш крок допереду і два назад. Часто собі тоты партнеры притім поталабають по ногах. Але танцюють. Высненый Будапештьов меншыновый ідеал бізовно Мадярі на Україні не досягнуть, але холем дашто при тім танцьованю досягнути можуть.

Нажаль, Русинів Київ ани не думать взяти до танця. Про владу, котрой міністром є Кулеба, так як про вшыткы попередні влады, не існуєме а обвиньовати і ображати нас без причіны є про них скоріше правилне, як неприятельне.

Статя была написана як коментарь „Вступне до контроли“ лемківского радія lem.fm. Фото: Wikipedia.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА