Курорт Рыманів остає в руках воєвідства

Представникы підкарпатского воєвідства заповіли, што будут новы інвестициі в курорті Рыманів. Шеф дозорной рады спілкы Курорт Рыманів подал, што фінансова кондиция курорту є добра, а діяня ЦАБ (Центрального Антикорупцийного Бюра) безпосередньо не односят ся до діяльности спілкы.

Медже самоурядом ґміны Рыманів а зарядом воєвідства послідні місяці прошли під знаком напятых односин. В маю радны ґміны приняли схваліня, што будут хотіти переняти уділы курортной спілкы од самоуряду воєвідства. Такє рішыня поясняли тым, што заряд воєвідства не вывязал ся зо складаных обітниц о розвитку і інвестициях в курорті і што локальный самоуряд задбат о курортну спілку ліпше як заряд воєвідства.

Ґміна хотіла переняти курорт

В звязку з тым звернули ся до спілкы, жебы тота неодплатні передала ім акциі спілкы, котрых од 2013 р. маітельом є маршалок. Голосы, што самоуряд воєвідства не контролює того, што ся діє в курорті, зачали являти ся іщы скорше, коли вказало ся, што ЦАБ веде поступуваня, переслухуют працівників, затримали і арештували бывшого директора, а пак презеска заряду спілкы уступила зо становиска.

В понедільок, 10. жолтня/октобра тр., в курорті стрітили ся представникы самоуряду ґміны Рыманів на челі з бургомайстром Войцєхом Фарбанцьом, радны воєвідства та ведучый соймику воєвідства Єжы Борч і заступці маршалка воєвідства: Ева Драус і Пьотр Пільх та член заряду Станіслав Кручек. Зо страны спілкы Курорт Рыманів СА были м.ін. Вацлав Шарый, член дорозной рады, што полнит тепер функцию презеса заряду спілкы.

Стріча прошла з ініциятивы маршалка Владислава Ортиля. Ішло о тото, жебы выяснити квестиі, котры явили ся в публичным просторі, в медиях, што тыкали м.ін. пропозициі перенятя спілкы містом Рыманів ци поступуваня ЦАБ.

Курорт занотувал прихід

Віцемаршалок Пьотр Пільх заповіл, што залежыт ім на спілпрацы з самоурядом ґміны Рыманів. Припомнул, што воєвідскій самоуряд заінвестувал веце як 45 млн зл, а в наступных роках заінвестує іщы два-, трираз веце. На ремонт ждут од років нехоснуваны обєкты, як напр. санаториі Кристина, Ґоздава ци Леліва. «Тоты інвестициі будут фінансуваны з Державного Пляну Одбудовы (ДПО). Перше з урядовых середків, пак рефундуваны з унійных» – повіл маршалок Пьотр Пільх. Підкрислил, што кондиция курорту є барз добра, за 2021 рік выробила зыск высокости 4 млн зл.

Полнячый обовязкы презеса спілкы Вацлав Шарый заґарантувал, што курорт веде нормальну лікуючу діяльніст. «60% місц для пациєнтів є занятых, то чысло в нормі. Першый раз од піл рока занотували сме додатній фінансовый результат. Хоц з причыны пандеміі є тяжкій час для курортів, никого сме не звільнили, глядаме дохторів» – ствердил В. Шарый. Поінформувал, што спілка уж тепер, без смотріня на грошы з ДПО, хоснуючы своі грошы, пожычкы, кредиты, ремонтує дорогу до санаториі Зємовіт, а в пляні має термомодернізацию, выміну пеца, фотовольтаічну інсталяцию.

На звіданя о діяня ЦАБ ствердил, што тыкают особовых справ, бывшых робітників курорту. Подля него, не мат то влияня на діяня курорту.

Важный є розвиток

До декляряций о великых інвестициях і новым окрытю навязал бургомайстер Рыманова Войцєх Фарбанєц. «Для нас курорт є найважнійшый. То основа стратеґіі розвитку нашой ґміны. Kурорт дає роботу парусот особам і залежыт нам, жебы ся розвивал. Самоуряд не буде ся старал переняти уділы в спілці.»

Фот. uzdrowisko-rymanow.com.pl