Лемківскій Ансамбль Пісні і Танця Кычера з Ліґниці під конец липця/юлия т.р. взял участ в ювіленыйм 50. Фестівали Фольклору Польскых Ґуралів в Жывци. Колектив тым разом был трикрактно нагородженый в конкурсовій части фестівалю.
Ансамбль оцінено в трьох ріжных катеґориях. Як векше оцініня мож брати вытипуваня Кычеры через жырі репрезентувати Польщу в проходячым в днях 17.-23. серпня/авґуста 51. Фестівали Фольклору Гірскых Земель в Закопаным.
Обряд – лемківскє весіля
Єдно з оцінінь было признане для ансамблю за выставліня видовиска. Кычера запрезенувала ся з обрядом – лемківскым весільом. Лемківска ґрупа была выріжненым в катеґориі ансамблів пісні і танця. Кычера запрезентувала обряд, котрый был під назвом Лемківскє весіля. В хыжы молодиці перед шлюбом.
На спомянутым фестівали, якій проходил в днях 27. – 30. липця/юлия, окрем Кычеры, выступило 26 інчых фольклорных ґруп з цільой Польщы. Більшіст з них презентувало народны обряды. Перше місце жырі рішыло передати для ансамблю Вєрхы з Мілювкы. Золоте Жывєцкє Серце трафило в рукы той ґрупы за обряд Одпуст в Пжыленкові. Жырі признало і дальшы місця, передаючы участникам Срібне і Бронзове Жывєцкє Серце. Оцініня Кычеры было як раз єдным з шестьох выріжнінь, котре жырі рішыло признати поза головныма нагородами.
Успіх співаків
Успіхом погордити може ся і мужска співоча ґрупа Кычеры. Співакы заняли найвысше місце в катеґориі співочых ансамблів. Прото, што окрем співаків Кычеры жырі оцінило на такым самым рівни і другу ґрупу – Маґужанкі з Лодиґовіц, того рока на фестівали в катеґориі співочых ансамблів не признано Золотого Жывєцкого Серця. Перше місце вєдно отримали лемківска ґрупа і ґрупа жывєцкых ґуралів.
В тій же катеґориі, другє місце по рівно припало женьскій части Кычеры, котра была рівнорядно оцінена з женьском співочом ґрупом Скальник з Камюнкы Великой і мужском ґрупом Істебна з Істебной.
Кычера з запрошыньом на тогорічный Фестіваль в Закопаным
Жырі жывєцкого фестівалю вытипувало штырі ансамблі, котры будут репрезентувати Польщу на зачынаючым ся 17. серпня/авґуста 51. Фестівали Фольклору Гірскых Земель в Закопаным, якій є браный за єднен з найважнійшых гірскых фестівалів во світі. Серед ґруп, котры отримали запрошыня, находит ся як раз лемківска Кычера. Окрем ней, запрошыня повандрувало до ансамблів Сьварні з Нового Торга, Скальник з Камюнкы Великой і Вєрхы в Мілювкы.
фот. материял ЛАПіТ Кычера; facebook.com/OkiemFotoreportera
Коментарі