Кытайскы гості в Лемківскій Загороді в Ґладышові

Кытайска делеґация была в неділю, 13. жолтня/октобра тр., в Лемківскій Едукацийній Загороді в Ґладышові. Гості познали дакус істориі Лемків та попрібували молотити зерно, бити олій ци прясти. Барз ся ім любило.

Ґрупа туристичных операторів з Кытаю приіхала з долшом візитом до малопольского і підкарпатского воєвідств в рамках туристичной оферты маркы CARPATHIA. Серед вельох пунктів подорожы по Міфічній Краіні Карпат была стріча з лемківском культуром і спадковином.

З Азиі на Лемковину

Кытайскы гості заіхали до Лемківской Едукацийной Загороды в Ґладышові, приватного музею веденого Данутом і Ваньом Дзюбинами. «Дознали ся в нас основ про лемківску історию» – реляцийонує Данута Дзюбина. «Вказали сме ім розмаіты роботы, котры давно Лемкы робили на селі. Своіма руками прібували молотити ціпами і кєратом, мололи зерно, а з мукы робили опляцкы. Терли лен, пряли ниткы, крутили мотуз, били олій з лену, прібували зробити лжыцю» – вычыслят властителька Загороды.

Окрем выміненого, старшы і молодшы жытелі Азиі навчыли ся робити стрілявку з гусячого пера, а на закінчыня прібували, як смакуют типово лемківскы стравы: кныш, опляцкы, адзимка. «Были вшыткы барз зацікавлены, а наймолодше дівчатко, котре барз активні брало участ в варштатах, написало, очывидні по кытайскы, што іщы до нас верне» – веселит ся Данута Дзюбина.

Прогулькы на полудне Польщы

Візита в Лемківскій Едукацийній Загороді была лем частю шырокого проґраму оферты для заграничных туристів зрыхтуваной марком CARPATHIA. Через два тыжні кытайскым гостям вказано Краків, Ряшів, Ланцут, Пшеворск, Ярослав, Перемышль, Красічын. В Бєщадах была прогулька по тамі в Солині, візита в загороді жубрів в Мучным та перехід на Букове Бердо. Дальше – кытайскым туристам вказано Ліско, Загіря, Санок, Коросно і розмаіты атракциі ґорлицкого повіту, м.ін. Біч, костел в Санковій, Мазярску Загороду в Лоси, пияльню в Высовій ци стаднину кони в Реґєтові. Проґрам кінчыла візита в Пряшівскым Краю з познаньом Бардийова, Шаришского Замку, Пряшова і окремо – Кошыц.

Цілю оферты было одкрыти перед гістми з Азиі красу карпатскых земель і притягнути дальшых туристів, жыючых на сусіднім континенті.