Владыка Йона позволив печатати русиньскый псалтырь

Як інформовало Общество святого Йоана Крестителя, Высокопреосвященый владыка Йона Максим, пряшівскый ґрекокатолицькый архієпіскоп митрополіта, своїм писмом із дня 27-го авґуста 2026-го року уділив Imprimatur – повзволіня печатати, про выданя перекладу псалмів на русиньскый язык.

В офіціалнім писмі ся пише, же владыка так вырішыв по „пробаданю передложеных текстів, як і по отриманю Nihil obstat із боку повіреного священика – отця Івана Барны, котрый тым заґарантовав правилность тексту перекладів. Nihil obstat є позітівна оцінка церьковного цензора, котра значіть, же нич не боронить тому, жебы церьковный текст міг быти выданый.

Як нашу редакцію інформовав отець Мілан Ясик, председа Общества святого Йоана Крестителя, до друку підуть дві выданя. Перше під назвов Книга псалмів, друге під назвов Співам Господу псалмы.

Покля в першій публікації будуть псалмы дзеркалово выданы – на єднім боці по церьковнославяньскы, на другім по русиньскы, чісто як біблічный текст, друга публікація буде обсяговати лем русиньскый переклад псалтыря, і псалмы будуть розділены ґрафічныма сімболами, жебы люди могли правилно псалмы співати при різных літурґічных подіях, припадно ся їх молити дома.

Русиньскый переклад псалмів іде подля восточной традіції, чіслованя є подля Септуаґінты, і псалмы суть поділены на кафізмы.

Отець Ясик так само інформовав, же книгы із псалмами на русиньскім языку бы мали выйти іщі тот рік.

Припоминаме, же в минулім році із платностьов од 1-го авґуста Рада єрархів Ґрекокатолицькой церькви на Словакії – верьховный орґан митрополітной церькви, схвалила Літурґікон – Божественну літурґію од нашого святого отця Йоана Златоустого, по русиньскы.

Так само в септембрі минувшого року кір Йона уділив Imprimatur на выданя Нового завіту в русиньскім языку. Обидві публікації были в тім самі році выданы, і дістали ся до практікы.