«Ластівочка» одсвяткувала 25-літя. Членів выріжнено Нагородом ім. Никыфора

45. Лемківска Ватра на Чужыні, яка прошла в днях 8.-10. серпня/авґуста 2025 р., была місцьом векшых і менчых ювілеів. До тых вызначнійшых, одзначеных при нагоді суботнього ватряного пополудня, зарахувати треба ювілей 25-літя діяльности Лемківского Ансамблю Пісні і Танця «Ластівочка».

Ансамблю, якій уж чверт столітя (все така фраза достойнійше звучыт) презентує автентичный лемківскій фольклор, а при тым і тот стилизуваный. Так ци інакше, незалежно од минулых років, «Ластівочка» є доказом тых діянь теперішнього лемківского середовиска, якы засвідчают о не лем о утырваляню минулого, але фурт сут проґресивны – з думком о розвитку, ґрупуваню молодых талантів і выставлюваню чысленній публиці найціннійшых примет лемківской музичной і танцювальной культуры.

Того рока першый раз в істориі Капітула Стоваришыня Лемків выріжнила Нагородом ім. Никыфора – Епіфана Дровняка колектив. Премія была признана вшыткым актуальным і бывшым членам «Ластівочкы» – з нагоды шумного ювілею. Але предовшыткым з нагоды плеканя членами ансамблю нашой культуры. То тіж выріжніня для тых, якы найбільше посвячали ся і фурт ся оддают справі діяльности пшемківской «Ластівочкы».

Капітула Стоваришыня Лемків, яка рішат о признаваню Нагороды ім. Никыфора, зробила выняток. І мала ґу тому право – шак «Ластівочка» то колектив діючый при Кружку Стоваришыня Лемків в Пшемкові. Никыфор, якій символично припал вшыткым членам ансамблю, одтепер є вызнаньом цілой ґрупы лавреатів.

Ден перше (о чым сме уж писали), передано традицийні Нагороду ім. Никыфора особам, якы прислужыли ся своім жытьом лемківскій культурі. Тым разом нагороджено колектив люди, якы од років оддавали і оддают свій час і таланты нашій культурі. А материялизує ся гевсе часто на сцені, уж як фінал трудів, а неєднократно на пробах ци зґрупуванях.

Три поколіня

Нагороду ім. Никыфора для членів ЛАПіТ «Ластівочка» з нагоды 25-літя діяльности передала проф. Олена Дуць-Файфер, заступця Ведучого ГЗ СЛ. На сцені вказали ся всітри поколіня, якы днес творят ансамбль. Од тых найстаршых – несторів, не лем віком, але і стажом, по тых найменьшых. Шак при «Ластівочці» наштоден діє найменьша ґрупа – «Ластівчата», надія і будуче на наступных двадцет пят років.

Оцініня одобрали репрезентанты «Ластівочкы» – інструкторы і аніматоры культуры – Марта Німаш, Андрий Перегрим і в двойній роли Євген Габура. Він же як другій Заступця Ведучого ГЗ СЛ, а при тым perpetumm mobile ансамблю, його голова і орґанізатор штоденной діяльности.

Кєд ся задумати, чым днес є «Ластівочка», одповід буде очывидна – значыня того як раз ансамблю єст барз важне. То не лем внутрішнє, узкє значыня (інтеґрация лемківской молодежы, проба затримуваня асиміляцийных процесів), але тіж тото шырше, што проявлят ся в промоциі лемківской культуры, вказуваню єй на вшыткых можливых фронтах – од сельскых сцен по королівскы салоны.

Ансамбль был основаный в 2000 р. за спілініциятивом Маргариты Гербут і Адама Бочнєвича. Початково ґрупа звала ся «Кружок» – гейбы за справом того, што діяла при так само новооснованым товды Кружку Стоваришыня Лемків в Пшемкові. Через вшыткы рокы свойой активности з камерального дітячо-молодіжного колективу «Ластівочка» выросла до єдного з найбарже ціненых лемківскых фольклорных ансамблів в Польщы і поза єй границями.

В 2006 р. новы інструкторы – Анна і Андрий Перегримы, разом з властями Кружка СЛ в Пшемкові рішыли перетворити співочу ґрупу в Ансамбль Пісні і Танця «Ластівочка», што довело до выробліня хореоґрафіі танців.

Як стоваришыньовый ансамбль, «Ластівочка» є шторічном «ґаздыньом» осінньой подіі Стрічы Трьох Поколінь з Лемківском Культуром.

За 25 років ансамбль был вельократно оціняный. Не спосіб вычыслити вшыткы оцініня. Лем спомнийме на 2017 р., коли «Ластівочка» отримала престіжный цертифікат CIOFF. На ріжных фестівалях і концертах, в котрых брала дотепер участ, отримувала выріжніня. Ансамбль в своім репрертуарі до той поры опрацувал два видовиска – елементы традицийного лемківского весіля. Перше были то «Лемківскы очепины», а тым разом колектив вернул до нас з «Дружбівскым вечером». Пишу вернул – бо як раз вчас суботнього вечера іх выступ, з представліньом давных дружбівскых звыків, был єдным з найцікавшых вчас 45. Лемківской Ватры на Чужыні.

Чого желати «Ластівочці»? Лем шумных што найменьше дальшых 25 років. До того – кріпкости для єй ведучых, тых, котрым наштоден ся «хоче». А то нелегка праца, повірте на слово.