Леґальне місце для любителів бушкрафту і сурвівалю

Постепенно знимают рестрикциі введены в звязку з ограничыньом пошырюваня ся пандеміі коронавіруса, примірово од 8. мая зас, кєд є така потреба, мож ночувати в готелях, кінцьом мая буде мож зісти замовлену в реставрациі страву не лем поза локальом, але і в середині. Кєд єднак найвеце тішыт вас розрывка близко натуры, то Державны Лісы приходят з новом пропозицийом.

Од 1. мая мож леґальні спати в лісі. «Ночуй в лісі» то назва проєкту реализуваного Державныма Лісами. Напрявленый є він на особы, якы захоплены сут безпосереднім контактом з природом. В рамках проєкту удоступнены сут специяльны лісовы місця, де аматоры спаня серед природы можут тото сміло робити без тырвогы о нарушаня переписів. Проєкт єст ефектом пілотажу, котрый проходил в минулым році.

Спаня «на дико» в лісі

Державны Лісы працували над проєктом уж од долшого часу, а пандемія лем приспішыла остаточны рішыня. Вызначыли они обшыри в 425 надлісництвах (разом веце як 600 тис. гектарів), де мож розбити шатро ци гамак (тото розвязаня преферуют надлісництва). Не мож єднак віхати до ліса автом ци кампером. Спаня в лісі то радше пропозиция для аматорів бушкрафту і сурвівалю як преферуючых выгоду. Дотепер не мож было розбити шатра в публичным лісі. Од 1. мая є інакше. Кажде надлісництво вытипувало обшыр до леґального ночуваня, прим. надлісництво в Щецінку запрашат до експлоруваня барз великой обшыри (коло 5-6 тис. га), інчы удоступняют менше, по парудесят гектарів. Терен не єст нияк означеный, зато треба докладні перезріти мапу на сайті Державных Лісів.

Мапкы обшыри, на котрых мож спати в лісі «на дико», і реґуляміны доступны сут на сайтах поєдных надлісництв. Перед вандрівком до ліса треба тіж все конечні провірити, котры місця обняты сут заказом вступу, напр. з огляду на загорозу пожару. Актуальны даны находят ся тіж на сайті Банку Даных о Лісах.

Кєд выбераме ся спати до ліса в малій ґрупі на ден ци два, то никого не треба о тым інформувати. Кєд єднак плянуєме выізд в ґрупі веце як 9 осіб або ночувати хочеме долше як 2 ночы, треба выслати зголошыня через сайт выбраного надлісництва найпізнійше на два робочы дни перед приіздом на місце. Важна є тіж квестия варіня. Туристичны кухенкы мож хоснувати лем в 46 місцях в Польщы. Найдеме іх на сайті Державных Лісів.

Мати на увазі треба, што в лісовым готели выгід неє, сут зато дикы звірята, овады, але і не все добра погода. Треба ся зрыхтувати на спартаньскы условя.

Фот. Ярослав Мазур