Лемківска Творча Осін завитат до Фльоринкы

В найблизшу суботу, 13. жолтня/октобра 2018 р., зачне ся ХХVI Лемківска Творча Осін. Літературна стріча творців з Польщы, Словациі і Украіны пройде головно во Фльоринці – селі, де перед 100. роками была покликана Руска Народна Республика Лемків.

Тогорічна Осін присвячена буде річницьовым упамятніням повязаным з подіями з 1918-1921 рр. Был то час державотворных аспіраций Русинів, в тым Русинів на Лемковині, якы проявляли своі стремліня ґу покликаню свойой державы. Так тіж суботня стріча одбуде ся в місци, де 5. грудня/децембра 1918 р. проходило історичне віче, якє внет дало початок Рускій Народній Республиці Лемків.

Стріча зачне ся о 15.00 год. при муруваній церкви св. Михала Архангела, близко котрой проходили тоты історичны подіі. Одтамале літераты і запрошены гості повандруют до сусідньой Білцаревы, де спочыват о. Теофіл Качмарчык, парох Білцаревы в 1879-1922 рр., русиньскій нацийональний активіста, котрого сын, др Ярослав Качмарчык, был на челі РНРЛ, як премєр-міністер. Покійний священник спочыват в гробници при храмі св. Димитрия.

Близко 16.00 год. пройде офіцияльне отворіня ХХVI Лемківской Творчой Осени. Голос забере др габ. Олена Дуць-Файфер, яка выголосит слово ґу річницям. Пак зачне ся літературна сесия, на котрій домашні та приіздны творці презентувати будут своі творы, якы навязуют головно до політичных подій сперед столітя.

Другом річницьом, яка буде припомина вчас тогорічной Осени, є 50. річниця смерти выдатного представника лемківского малярства – Никыфора Креницкого. Артиста помер такой рівно 50. років тому, 10. жолтня/октобра 1968 р. Літераты в своій творчости одкликувати будут ся так само до маляря. Завершыньом стрічы во Фльоринці буде выступ ансамблю Терочка з Ґорлиц.

Заперта част подіі пройде наступного дня в просторах Руской Бурсы в Ґорлицях. Буде то робоча стріча творців з представниками лемківскых медий.