Зындранівскє «Од Русаль до Яна» уж в тот вікенд

Уж в найблизшый вікенд Музей Лемківской Культуры в Зындрановій буде місцьом подіі з долгом традицийом – «Од Русаль до Яна».

Подія буде проходило два дни – 25.-26. липця/юлия. Свято од років єст важным пунктом в календарю лемківскых культурных стріч. До Зындрановой сходят ся Лемкы з рідной Лемковины, але тіж дальшых части Польщы, Словациі ци Украіны, жебы разом пережывати традицию, стрічати давных і новых приятелів та шанувати лемківску спадковину – што як раз єст головным цільом музейной діяльности.

Орґанізаторы приготували богатый проґрам, в котрым не бракне ани музикы, ани народного ремесла, ани інтересных выкладів і стріч з авторами книжок.

Суботній проґрам зачне ся о 16.00 год. Охочы будут мочы звиджати Музей Лемківской Культуры, запознати ся з його експозициями та дознати ся о давным жытю на Лемковині. Пак о 18.00 год. зачне ся сценічный проґрам – запрезенутют ся Гудаци та Капеля Еста. Загорит ватра.

Неділя зачне ся молитвом. О 11.00 год. в церкви св. Миколая в Зындрановій буде одслужена Божеска Літургія. По ній буде офіцийне одкрытя подіі. Перед публиком выступлят Свидницкы Геліґонкаре, Капеля Дукляне, Ославяны, Калина, Маковиця, Мариянна Железна і Фоґаш, Карпатія, Гудаци і Бурян.

Протягом цілого дня проходити будут показы ремесла, конкурсы, забавы і атракциі для діти та дорослых. Як і в суботу, недільне святкуваня завершыт ся спільным огниском, котре стане нагодом до бесіды, співу і стріч в приятельскій атмосфері.

Місце з історийом

Першый річник «Од Русаль до Яна» был зорґанізуваный в 1992 р. Долголітнім орґанізатором подіі был Федір Ґоч, єден з основателів Музею, пак його вельолітній опікун.

1. червця/юнія 1995 р. офіцияльно зареґіструване было Товариство для Розвитку Музею Лемківской Культуры.

Початкы істнуваня Музею Лемківской Культуры в Зындрановій ідут од стрічы з 17. серпня/авґуста 1968 р. в Білянці. Там же прошла нарада при присутности лемківскых діячів. Были то Михал Доньскій, Михал Дзвінка, Федір Ґоч, Павел Стефановскій, Ярослав Трохановскій, Федір Кузяк та Леон Ґаль. Стріча закінчыла ся покликаньом до жытя Музейной Рады і Ізбы Памяток Лемківской Культуры в Зындрановій. Прото тіж офіцияльный початок музейной діяльности то 18. серпня/авґуста 1968 р. Музей початково фунґувал як Хыжа Памяток Лемківской Культуры.