Лемківска забава в Пшемкові

Филиповий піст уж давно за нами, Різдво Христове тіж. По тым часі, все приходит охота на забаву. В ріжных державах світа початок нового рока є асоциюваний з шумні обходженым карнавалом.

Хоц карнавал то слово латиньского походжыня, давно тому Русины находили на тот радістний час своі слова. Всякы забавы, гулянкы, вечыркы, або інчы стрічы (ци по днешньому – дискотекы) перед Великым Постом звали ся пущанями. Окрем того, треба розріжнити пущаня од мясниц, котры днес сут браны за синонімы. Може в нашых часах не спостерігаме той ріжниці, але нашы бабы іщы памятают, в чым діло! Отже, мясниці то період перед початком Великого Посту, в котрым же проходят речены забавы.

І в мясницях, як во вшыткым што тыкат фурт ідучого вперед языка, находиме семантычну метаморфозу. Час, котрий має нам припоминати о тым, же уж неодолга повинни сме быти лем о хлібі і воді, а мяса наісти ся наперед, выдолжаме до латиньской традициі пониманя того слова, зачынаючы мясниці – на втіху молодежы – одраз по Богоявліню. А може то спосіб на глубше пережываня посту?

Але вернийме до пущаня –  в суботу, 27. лютого/фебруара т.р., Кружок Стоваришыня Лемків в Пшемкові просит на Лемківску Забаву. Подія пройде в Пшемківскым Осередку Культуры, початок од 20.00 год. Вступне то 90 зл, а до гуляня пригрывала буде капеля Троянда. Орґанізаторы заявляют про можніст скоршой резервациі білетів.

Більше інформаций – долов на поміщеным афішы.

Іван Русенко 

Мясниці ся уж кінчат

Уже кінчат ся мясниці…
Пак піст – і по карнавалі…
Аджек дамы і дівиці
Робят балі і так далі.

Ідут на баль з каждой страны,
Ідут мало же не вшыткы:
Ідут пані, панны, паны,
Шумны, ладны а і брыдкы.

Ідут не лем попадянкы,
Доркы, Даркы, Манькы, Янкы…
Але тіж і меншы пані –
Насткы, Тевдоскы і Гані.

Тамтым грают капеляне,
Дуют в трубы – най Бог хранит!
А тым другым лем Циґане…
Тай на гушлях розтрісканых!