LEMtravel, значыт І Лемківскій Подорожничий Фестіваль прошол 12.-13. мая 2018 р. в сідибі Стоваришыня «Руска Бурса» в Ґорлицях. Была то перша того рода подія орґанізувана на обшыри Низкого Бескіду. Протягом двох дни мож было слухати інтересуючы оповісти зо світа. Была нагода познати тых малых і великых подорожників, розбудити любов до вандруваня, одкрываня і познаваня нового. А вшытко тото прошло так в лемківскым, як і польскым языку.
Суботній проґрам фестівалю зачал ся од варштатів сурвівалю, якы были ведены паром експертів в тій обшыри – Клявдийом Ядвіщык і Кжыштофом Левіцкым. Пак в головній сали бурсы прелекциі выголосили специяльні прошены гості. Лукаш Коцевяк, автор книжкы «Аконкаґуа. В тіни Сніжного Сторожа», розповіл про свою любов до высокых гір. Аліция Барць і Бартош Мацєєвскі поділили ся деталями іх 3 тыжньовой роверовой екскурсиі довкола Ісландиі. Посліднім прелеґентом того дня был Томаш Вольнік, котрий представлял історию Карпатской Долины Смерти.
В неділю тіж обзерали сме презентациі і слухали оповісти. Проґрам того дня зачал ся од подорожы Юстины Секулы в Мрачны Бескіды і історий люди звязаных з Бескідами. Пак Якуб Зиґмунт взял вшыткых до Естоніі – до краіны Угрофінів. Павел Малецкій вказал красу нацийональных парків і каніонів західніх ЗША. І Лемківскій Подорожничий Фестіваль завершыла оповіст Клявдиі Ядвіщык і Кжыштофа Левіцкого про тандемову експедицию з псом за полярний круг і Нордкап, за яку были номінуваны до нагороды Travellery 2018 в катеґориі «Подорож Рока».
Емоций на LEMtravel не бракувало. Подія згромадила на каждій прелекциі велику публику, яка жыво реаґувала, давала додатковы звіданя та ділила ся своіма пригодами і досвідом. Іщы не скінчыла ся перша едиция фестівалю, а гості домагали ся орґанізациі другой, што барз радує орґанізаторів подіі.
LEMtravel был фінансово пітриманий Містецкым Урядом в Ґорлицях, нагороды в конкурсах спонсорувал Sklep Rowerowy Ostre Koło в Ґорлицях, нічлігы для прелеґентів дал Restauracja&Hotelik Leśny Dworek в Ґорлицях.
Знимкы робили: Наталия Пацана-Роман та Якуб Ґузік і Данута Павловска з блоґа Łemkowyna, na Beskidzie Niskim.
Коментарі