Лемківско-польскій календар ЛЕМКОЛЯНД 2016

Як выглядат Лемковина в очах діти? Одповід на тото звіданя можете найти в Календарі Лемколянд на 2016 рік, котрий тілько што ся вказал. Календар єст вынятковым выдавництвом – містит 12 кольоровых образків, вказуючых Лемковину в штырьох порах рока. Малюнкы зробили діти в рамках плястычного конкурсу, оголошеного Лемколяндом (www.lemkoland.com), а дванадцет найкрасшых поміщено в календари.

Календар сполнят едукацийну функцию, адже назвы місяців поданы сут в двох языковых версиях: по лемківскы і польскы (кірилицьом та латинком). Окрем того, означено в ним найважнійшы церковны і костельны праздникы, а і свобідны од роботы дни та державны свята.

«Календар для діти Лемколянд» то нова ініциятыва Фундациі Стара Дорога, котра має на ціли едукацию наймолодшого поколіня Лемків (фундация веде м.ін. перший лемківскій едукацийний сайт для діти і выдає часопис «Лемколянд»).

Дохід з продажы перезначений буде на сотворіня специяльного фонду, котрий мат сперати діти і молодіж з артистычным талантом, і на спомаганя вести едукацийну і выдавничу діяльніст Лемколянду і лемківского едукацийного часопису для наймолодшых).

Про дрібниці закупу пиште на адрес info@lemkoland.com.

Фото і текст – на основі материялів присланых до редакциі.