Од початку січня/януара т.р. мож в будинку Головной Бібліотекы Технічного Університету (AGH) в Кракові видіти выставу фотоґрафіі Яцка Жепчыньского, котра вказує цекрви Лемковины.
На експозициі нашло ся 56 знимок вказуючых церкви з обшыри Малопольщы та 15 знимок іконостасів, якы ся в них находят. Більшіст (бо 37) спосеред представленых церкви фунґує тепер як римокатолицкы святині, вісем як православны храмы, а сім як грекокатолицкы. Серед сфотоґрафуваных церкви сут тіж такы, якы сут музейныма обєктами, а то церков з Чорного, яка находит ся в Етноґрафічным Парку в Новым Санчы і грекокатолицка церков в Бортным (обєкт Музею Дворы Карвациянів і Ґладышів в Ґорлицях).
Не бракло серед сфотоґрафуваных церкви і тых, котры находят ся на списку світовой спадковины ЮНЕСКО, а то церкви в Рыхвалді, Поворознику, Брунарах і Квятони. Автором знимок є Яцек Жепчыньскій, працівник Самодільной Секциі Компутеризациі Головной Бібліотекы УТ (AGH). Гоббі фотоґрафуваня зродило ся в него в 80. роках ХХ ст., а найчастійшыма мотивами знимок сут: родинный Краків, деревяна архітектура та забава світлом.
Придумана резиґнация з кольору
Покликуюы ся на слова бритийского фотоґрафіка Домініка Русо, што «кольор є вшыткым, але чорне з білым дают веце» (Color is everything, black and white is more), автор выставы презентує більшіст знимок в чорно-білій тонациі. Хоче тым самым тіж гейбы вернути до коренів фотоґрафіі, переформляючы кольорову реальніст діґітальной фотоґрафіі до чорно-білой верствы. Подля автора, монохроматичный образ дозвалят одсепарувати неважный, кольоровый фон, для зосереджыня ся на головній темі знимкы.
Дополніньом выставы сут іконы зроблены техніком декупажу авторства Ренаты Жепчыньской. Выставу мож обзерати до кінця лютого/фебруара.
Пошырена версия експозициі
Електронічна, пошырена версия выставы презентує (окрем знимок, котры мож видіти на експозициі в Бібліотеці) фотоґрафіі вшыткых забытковых церкви Лемковины, ідучы од Шляхтівской Руси, через Сандецкій Бескід, по Низкій Бескід. Авотр помістил гын тіж знимкы коло 50 церкви, якы находят ся в Бєщадах, на Словациі та на Підляшы.
Коментарі