Лемківскы байочкы в Жыдівскым Музею Ґалиция в Кракові

Жыдівскій Музей Ґалиция в Кракові кінцьом минулого місяця зачал нову ініциятиву адресувану для наймолодшых – серию стріч пн. Вельокультуровы байкы на добраніч в Ґалициі. В найблизшу неділю презентуваны будут лемківскы байочкы.

Акцию подумано так, же каждого місяця орґанізувана є єдна стріча присвячена выбраній меншыні. Презентуваны сут анімуваны фільмы звязаны з культурами етнічных, нацийональных і реліґійных меншын. Каждій байці товаришыт стріча з представником даной соспільности або експертом, котры ділят ся додатковыма інформациями о культурі і істориі меншыны.

Перша, марцьова байка на добраніч присвячена была жыдівскій меншыні. Чергова стріча тыкати буде лемківской. Вказаны будут анімуваны фільмы Голод та Байка про тото, як теля хлопа зіло, што зреалізуваны были Анном Хаброс-Пилат завдякы Фундациі Стара Дорога. Проєкциі байок товаришыти будут лемківскы гры і забавы анімуваны через Марту і Кжыштофа Бутринів, якы ведут фундацию. Заплянувано згадуванкы, рахуванкы, забавы, м.ін. «Няньо і мати», «Де єс был, чорний баране». Вечер закінчений буде лемківскыма співанками на добраніч.

Єдном з ініциятив Фундациі Стара Дорога є проєкт Лемколянд направлений на едукацию наймолодшой ґенерациі лемківской меншыны. На інтернетовым сайті проєкту поміщено гры, малюванкы, співанкы і байкы, котры помагают вчыти ся лемківской азбукы і языка. Окрем того фундация печатат квартальник для діти «Лемколянд», выдал Лемківску Книжочку, Лемківскій Зільник ци Календар Лемколянд. В рамках проєкту реалізуваны сут анімуваны фільмы вказуючы традициі і культурову спадковину Лемків.

В наступным місяци діти будут мочы ближе понзати караімскы байкы, а в червци/юнію заплянувано дві стрічы присвячены ізраільскым байочкам. Тоты проходити будут в рамках Фестівалю Жыдівской Культуры.