ПУЛС в Будапешті із найвысшым оцініньом

Піддукляньскый умелецькый людовый субор – професіоналне русиньске умелецьке тілесо, в днях 12-го аж 19-го юна 2026-го року брав участь на 31-ім річнику фестівалу Duna Karnevál 2026 в Будапешті.

ПУЛС знова раз успішно репрезентовав русиньску културу і Словацьку републіку, кедь із столиці Мадярьска вернув із найвысшым оцініньом.

Дунайскый карневал, як звучіть назва фестівалу по русиньскы, є меджінародным фестівалом, котрый проходить в мадярьскій столиці кажде літо. Вісемдньове свято все окрем домашніх умелців представлює і гостів із заграніча. Іде о фолклорны колектівы, капелы граючі world music, участници можуть зажыти жывы концерты, выступліня, танечны переглядкы але і карневалову процесію центром міста з ґалапроґрамом.

ПУЛС, котрый восени одсвятковав 70 років, тот рік так само брав участь на Duna Karnevál, якый належыть меджі найпрестіжнішы фолклорны фестівалы в Европі. Тогорічный Дунайскый карневал привітав выступаячіх і з далшых країн – Бразілії, Булгарії, Польщі і Іспанії.

„Вызначнов частьов фестівалу были выступліня реномованых будапештськых професіоналных тілес – Magyar Állami Népi Együttes і Duna Művészegyüttes. У вынятково міцній меджінародній конкуренції ПУЛС успішно репрезентовав свій кумшт, котрый здобыв увагу фаховой і фестіваловой публікы,“ інформовав ансамбель на своїм офіціалнім сайті на сіті Facebook.

„Завершіньом дакількодньового фестівалу быв святочный ґалапроґрам в унікатнім оточіню амфітеатру на Острові Марґіты в Будапешті. На єдній сцені зышли ся вшыткы участници фестівалу, і тісячі зрітелів могли зажыти пестру мозаіку традічной културы із різных кутів світа,“ продовжовав ансамбель із тым, же участь на такім престіжнім меджінароднім форумі принесла ПУЛС-у нелем цінны умелецькы скушености і новы меджінародны контакты, але і вызначне узнаня од фаховой жюрі.

ПУЛС здобыв найвысше оцініня фестівалу – Mucsi János Festival Award. Премія уділює ся за выняткову умелецьку якость і цілковый вклад до цінностей фесітвалу Duna Karnevál. ПУЛС здобыв оцініня за танечный театер і оцініня за музику.

„Тот успіх потверджує высоку умелецьку уровень ансамблю і його способность репрезентовати Словакію на найвызначнішых меджінародных подіях,“ закінчів ПУЛС на соціалній сіті.

Фото: @gorácz