Лемкознавча конференция в Польскій Академіі Знань (нажыво) – понедільок, 16.45 год.

Як сме уж заявляли на нашым портали, в понедільок, 22. лютого/фебруара 2021 р., одбуде ся лемкознавча конференция, на яку просит Польска Академія Знань – Східньоевропейска Комісия. Дискусия пройде під назвом «Лемкознавство в ХХІ ст. – критичный реконесанс».

До выступлінь прошены науковці, дослідникы лемкознавства в ріжных обшырях: др габ. Олена Дуць-Файфер, специялистка лемківской літературы, основателька і долголітня ведуча лемківско-русиньской філолоґіі на Педаґоґічным Університеті в Кракові, др Богдан Горбаль, історик, робітник Нюйоркской Публичной Бібліотекы, др габ. Ева Міхна, адюнктка в Інституті Американістикы і Полонійных Студий Ягайлоньского Університету в Кракові, яка занимат ся темом меншын, в тым проблематиком лемківской і шлезской нацийональности, др габ. Анджей Зємба, історик Ягайлоньского Університету, частый гіст орґанізуваных через Стоваришыня Руска Бурса подій, і Даміян Новак, історик, якій занимат ся м.ін. історийом, описами і плянами лемківскых церкви і сакрального будівництва.

Стріча має зачати ся о 17.00 год. Ціліст з причыны пандемічных ограничынь буде трансмітувана онляйн за посередництвом плятформы ZOOM, а звуковый пренос проведеме і в радию ЛЕМ.фм 22. лютого/фебруара 2021 р. од 16.45 год.

Высыламе на фреквенциях 103,8 MHz з трансмітера в Польковицях і 106,6 MHz в Ґорлицях. Можете нас слухати и через інтернет, натискаючы на буттон поміщеный горі сайту.