Лемкы в Палаци (фот. Ярко Мазур)

В неділю, 20. листопада/новембра 2022 р., в краківскым Палаци Потоцкых прошло свято лемківской поезиі. Была то стріча, в часі якой мож было познати ґенезу і приметы антолоґіі лемківской поезиі під назвом: «Ritorni / Powroty / Вертаня» – першого опрацуваня по італияньскы посвяченого як раз нашій літературі.

Стрічу вела ведуча Стоваришыня «Руска Бурса» в Ґорлицях Наталия Малецка-Новак, яка зрыхтувала тлумачыня завершального слова до реченой збіркы. Гістми стрічы были: Сільвія Бруні, авторка опрацуваня книжкы і тлумачынь вершів, проф. Олена Дуць-Файфер, авторка вступу до книжкы, та онляйн участ взяли Сімона Оттоленґі i Роберто Ґабрієле, авторы знимок, якы найдете в публикациі. Вєдно з присутныма бесідували м.ін. о тым, яку ролю в ратуваню спільнотовой памяти може мати музика ци як з літературы родит ся діалоґ, котрый зближат люди о ріжным походжыню.

Орґанізатором подіі было Артистичне Стоваришыня Porta Musicae.