Лемкы в обєктиві польского фотоґрафа

Осередок Промоциі і Культуры в Ченстохові «Gaude Mater» презентує выняткову выставу артисты фотоґрафа Кжыштофа Пєжґальского пн. Юрайскє село / Сліды.

Експозиция вказує дві окремы сериі. Юрайскє село єст репортажом і документом о реґіоні. Складат ся з 35. знимок, якы были выбраны з більше як тисяча зробленых протягом парунадцетьох років. Колекция єст етноґрафічным записом жытя ґаздів прожываючых на обшыри ґмін Янів, Нєґова, Ольштын та Пжырів і вказує найбарже традицийний вид села, котрий штораз скорше заникат.

Сліды то портретовий запис Лемків і Поляків, істория і жытя котрых сплели ся зо собом з огляду на примусовы выселіня з років 1945-1947. Серия обнимат 30 фотоґрафій з описами жытя даных осіб. Записаны істориі жытелів Лемковины были зобраны автором в 2014 році. Част з них то Лемкы, а част то Полякы, котры замешкали в хыжах выгнаных люди. Проєкт тот был выріжнений в конкурсі «Чловек понад границями» о нагороду ім. Павла Стшелецкого орґанізуваным Музейом Еміґрациі в Ґдыни в 2015 році. Был він тіж опубликуваний на інтернетовым портали National Geographic Traveler.

Обі вказаны темы, хоц так ріжны, лучыт особливий климат знимок, почутя затриманя в кадрі того, што минят, што ся кінчыт, а схоснувана чорно-біла фотоґрафічна техніка додає глубины переказу зобразуваного змісту.

Кжыштоф Пєжґальскі єст по професиі біолоґом. Занимат ся репортажовом, документальном і природничом фотоґрафійом. Публикувал м.ін. в «National Geographic Polska», журналах «Foto», «Poznaj świat», «Podróże», ци на порталях National Geographic Traveler і бритийскым Life Force Magazine. Єст автором вельох індивідуальных выстав о породожничо-етноґрафічных темах. Документувал пастырскы культуры Монґолів, Евенків, Кірґізів, андийскых Індиян, весільны обряды Гуцулів ци обряды в селах-твердынях на Кавказі.

Вернісаж выставы в осередку «Gaude Mater» проходил 7. липця/юлия т.р.

Фот. горі – Кжыштоф Пєжґальскі, пресовы материялы