Голосник

«Лісовый Запаленец», бесіда з Романом Цюриком – пятниця, 20.10 год.

Од якісого часу по лісі гулят єден Лісовый Запаленец… жебы притягнути до себе, хоц може єднак до ліса, інчых лісовых запаленців. Просиме на бесіду з Романом Цюриком з Вірхні, автором природничого проґраму «Leśni Zapaleńcy» доступного в сервісі Ютюб.

В своіх авторскых подкастах, а має іх уж парунадцет і не плянує кінчыти, Роман Цюрик з великым гумором і дистансом, хоц часом кус на поважні, оповідат розмаіты лісовы цікавинкы. Можеме ся з них м.ін. дознати, як скоро биє серце іжа і чом не можеме грабати листя в загороді, што робити, жебы дерева нам не плакали, коли дича мама є найнебезпечнійша, як розпознати шквірк, як смерек і решту шпильковых дерев. І вельо, вельо інчого.

В проґрамі Роман оповіст нам, як то ся стало, же зачал гуляти по лісі і іщы тото фільмувати, кілько треба часу, жебы зрыхтувати єден одтинок, де ся выбрати на добру лісову прогульку і чом то лемківскы лісы сут найліпшы ;).

Можете полюбити його фанпейдж на ґамбокнижці, де публикує знимкы з мешканцями ліса, все додаючы дакій цікавый опис, слідити конто на інстаґрамі і очывидні быти субскрибентом каналу на Ютюбі.

Премєра проґраму в пятницю, 29. мая, о 20.10 год.

Шеруй.

О авторі

Наталія Малецка-Новак

Хоц по школі інжынєр, то не тыкат ся роботы по тзв. фаху ;) Зато уж од вельо років доносит о вшыткым, што ся діє на Лемковині. І не лем. Штоденньо од 11.00 год. веде lifestyle'овый проґрам «Пачісна година» , а в суботы о 9.00 год. чытат для Вас порталь. Контакт: natalia@lem.fm

Коментарі